एम्बुलेन्स चालकको गोरख धन्दा

द एक्सक्लुसिभ सम्वाददाता
जनकपुरधाम............

जनकपुरमा सञ्चालित केहि एम्बुलेन्सका चालकहरुले गोरखधन्दा गर्ने गरेको रहस्य खुलेको छ । एम्बुलेन्सचालकहरुले कमिसनको भरमा विरामीहरुलाई आफू ईच्छा अनुकुलको क्लिनिक ,नरसिंगहोम र होस्पिटलहरुमा पट्याएर ठग्ने गरेको खुलासा भएको हो ।
 

बुधबार अकास्मिक उपचारको लगि एम्बुलेन्समा जनकपुर अञ्चल अस्पताल गएका एक जना विरामीलाई चालकले कमिसनको लागि अन्यत्रै एक होस्पिटलमा पुर्याएपछि यस्तो रहस्य खुलेको हो । बुधबार विहान महोत्तरी हरिनमरीका राजेन्द्र प्रसाद गुप्तालाई अकस्मात मुखबाट रगत आएपछि जनकपुरमा सञ्चालित बा.१ भm ७०० नम्बरको एम्बुलेन्समा बोलाएर जनकपुर अञ्चल अस्पताल पुर्याउन भनेका थिए । तर सो एम्बुलेन्सका चालक रामचन्द्र साहले विरामीलाई जनकपुरको विवाहमण्डपको पछाडीमा सञ्चालित रामजानकी नरसिंह होममा पुर्याएका थिए । 

 त्यसपछि विरामी गुप्ताका आफन्तले चाँडो अञ्चल अस्पतालमा पुर्याउन भनेपछि चालक साहले ‘ यो एम्बुलेन्स यसै नर्सिंग होमको हो म अरु ठाउँमा जान्न’ जवाफ दिएपछि विरामीका आफन्त सन्तोष गुप्ताले जानकी प्रहरी चौकीमा खबर गरी प्रहरी बोलाएर विरामीलाई अञ्चल अस्पताल पु¥याउन लगाएका थिए । त्यहाँबाट गोरखधन्दा गर्ने ती एम्बुलेन्ससहित चालक साहलाई प्रहरीले पक्राउ गरी जिल्ला प्रहरी कार्यालय धनुषामा रखेको जनाईएको छ ।   
 

जनकपुरमा कमिसनको खेलमा एम्बुलेन्स चालक र विचौलियाहरुको विगविगीले दैनिक उपचार गराउन आउने सयांै सर्वसाधारणहरु ठगिने गरेका छन् । जनकपुरमा पछिल्लो समय डाक्टर, क्लिनिक, होस्पिटल र नर्सिंगहोमहरुले कमिसनमा विचौलियाहरु राखेर आ आफ्नो तिर विरामी तानेर ल्याई ठग्ने गरेको  सर्वसाधारणहरुको गुनासो रहेपनि त्यसको समाधानका लागि कसैले पनि पहल कदमी लिएको छैन । यो त एउटा उदाहरण मात्र हो ।

 जनकपुर अञ्चल अस्पतालकै कर्मचारीहरु, चिकित्सकहरु निजी स्वास्थ्य संस्थाहरुका लागि कमिशन एजेन्टको रुपमा काम गर्ने गर्छन् ।  अस्पताल आइसकेका विरामीहरुलाई समेत मर्ने डर देखाएर बाहिर पठाउने गरेका छन् । यसका अतिरिक्त दलालका रुपमा औषधि पसलेहरु, प्याथोलोजि, एक्स रे, अल्ट्रासाउण्ड गर्ने संस्थाहरुसमेत विभिन्न स्वास्थ्य संस्थाहरुका लागि दलाली गर्ने गरेका छन् ।
 

२०७२ जेष्ठ ३१ गते आईतबार