गंगा सागर सफाई अभियानमा जुट्दै स्थानीयवासी

गंगासागर सफा गर्दै सेना र प्रहरी ।

द एक्सक्लुसिभ सम्वाददाता

जनकपुरधाम............

भारतमा खरबौं रुपैयाँको लगानीमा गंगा नदि सफाई अभियान चल्यो, नेपालमा अर्बौं रुपैयाँको लगानीमा बागमती सफाई अभियान चल्यो तर, जनकपुरमा स्थानियवासीहरुले आफ्नै प्रयासमा सुरु गरेको धार्मिक सरोबर गंगासागरको सरसफाई अभियानले दिन प्रति दिन तिब्रता पाएको छ । 

यहाँ राज्यले लगानी नगरेपनि समाजका विभिन्न पेशागत संघ संगठनका व्यक्तिहरु तथा नागरिकहरुको अगुवाईमा केही महिना अघि प्रत्येक शनिबारका दिन गंगासागर सफाइ गर्ने अभियान चलाइएको छ । उक्त अभियानमा स्थानियवासीहरु, नेपाल प्रहरी, सशस्त्र प्रहरी र नेपाली सेना समेत सहभागी हुन थालेका छन् । नेपाल पत्रकार महासंघ धनुषाका निवर्तमान अध्यक्ष राम अशिष यादव, अधिवक्ता राजकुमार महासेठ, समाजसेवी अमरचन्द्र अनिल, होटेल व्यवसायी विजय झुनझुनबाला, नबल मुरारका, मदन जैन, प्रहरी वरिष्ठ उपरीक्षक शिव लामिछाने, नेपाल सेनाका कर्णल डिजन पिया, पत्रकार ध्रुव झा, उद्यमि ओम प्रकाश सर्राफ, प्राध्यापक विजय दत्त, धर्मा मण्डल, विजय मस्त, नथुनीलाल दास, देव शरण साह, अशोक जालान, धर्मनाथ साह लगायतका व्यक्तिहरु प्रत्येक शनिबार गंगासागर सफाइ अभियानमा सक्रिय सहभागी हुन थालेका छन् ।

गंगासागरमा विसर्जन गरिएको
कलशहरु निकाल्दै स्थानिय यूवाहरु ।

 गंगासागरको सरसफाई र सौन्दर्यीकरणका लागि जिल्ला टूाफिक प्रहरी कार्यालय धनुषाका प्रमुख राजन भेटवाल र जिल्ला बन कार्यालय धनुषाका सहायक वन अधिकृत सुरेश शर्माको सहयोगमा पोखरीको डिलमा कपुर, निम, गोलमोहर फुल र बर पिपलको बोट वृक्षारोपन गरिएको छ । त्यसैगरी पोखरीमा रहेका फोहरलाई सफा गर्नका निम्ति ननुपट्टीका माछा व्यवसायी बौवेलाल मुखिया र श्यामबाबु झाको सहयोगमा ७ हजार सिलभर माछाको भुरा राखिएको छ । 

स्थिर पानी रहेको गंगाजलको फोहर पानीलाई सफ ागर्न माछाले सहयोग गर्ने हुनाले ग्रासकार्प, सिलभर र कोत्रि प्रजातिका माछाका भुराहरु गंगासागरमा राखिएको नेपाल पत्रकार महासंघ धनुषाका निवर्तमान अध्यक्ष राम अशिष यादवले बताएका छन् । हुन त गंगासागर, धनुष सागर र विहार कुण्डमा माछा खेती गर्न पोखरी ठेक्कामा लाग्ने गरेको छैन । यद्यपि उक्त पोखरीहरुका माछा पनि केही स्थानिय यूवा क्लवहरुले अबैध रुपमा विक्री वितरण गर्ने गरेको पनि पाइएको छ । 

यसका अतिरिक्त दशरथ तलाउ, अरगजा सरोवर, राम सागर सहितका पोखरीहरुमा व्यवसायीक रुपले नै माछा खेती गरिएको छ । तर, उक्त रकम पनि पोखरीको सौन्दयीकरणको लागि खर्च गरिएको छैन । उक्त पोखरीहरुबाट हुने आय कतै जानकी मन्दिर र कतै गुठी संस्थानले लिने गरेका छन् । कालो भएको गंगाजललाई सफा गर्नका निम्ति नथुनि साह, विजय झुनझुनबाला र ज्ञानु मण्डलको सहयोगमा ३५ बोरा चुनको प्रयोग गरिएको छ । 

गंगासागरको डिलमा स्थानियवासीहरुसँगै वृक्षारोपन गर्दै
समाजसेवी अमरचन्द्र अनिल र सहायक वन अधिकृत सुरेश शर्मा ।

विष्णु पुरान अनुसार भगवान विष्णुको अहवानमा गंगाजी प्रकट भई कुण्ड बनेको गंगासागरमा स्नान गरे महाकुम्भमा गरिएको स्नान रामेश्वरममा गरिएको स्नान बराबरको फल प्राप्ति हुन्छ भन्ने जनविश्वास रहिआएको छ । धार्मिक गन्थमा उल्लेख भए अनुसार हिमालयको काँख, उत्तरी क्षेत्र गंगोत्रिबाट सुरु भएको गंगा नदि नारायण पर्वत हुँदै ऋषिकेश, हरिद्वार सहित भारतका विभिन्न स्थानमा पुगेको गंगा नदिकै स्वरुप हो जनकपुरको पवित्र सरोवर गंगासागर । त्यसकारण गंगासागरको गंगाजललाई पवित्र बनाउनुपनि जनकपुरबासीकै दायित्व हो । 

गंगासागरमा माछाको भुरा राख्दै
नेपाल पत्रकार महासंघ धनुषाका निवर्तमान अध्यक्ष राम अशिष यादव ।

गंगा माता वास बस्ने गंगाजल फोहर  हुनुको प्रमुख कारण घर र मठमन्दिरमा गरिने पुजा सामग्रीको विसर्जन नै हो । मुन्डन गरेर फालिएको कपाल, भाँडा बरतन माजनु, लुगा फाँटा साबुनले धुनु, सबारी साधन गंगासागरमै लगेर सफा गर्ने गरेका कारण पनि गंगासागरको पानी प्रदुषित भएको नेपाल पत्रकार महासंघ धनुषाका निवर्तमान अध्यक्ष रामअशिष यादवले बताएका छन् । हालसम्म गंगा सागर सफाई अभियानको क्रममा ६० टयाक्टर भन्दा वढी फोहर मैला निकालिसकिएको छ । स्थिर पानीमा पुजा सामग्री विसर्जन गर्नु हुँदैन । प्लास्टिक रहित पुजा साम्रगी धर्ती माताको शरणमा गाडिनु पर्ने हो । संस्कृतिविद डा.राजेन्द्र विमलका अनुसार पानी चलिरहेको नदिमा मात्र पुजा सामग्री विसर्जन गर्दा लाभ हुने हो । स्थिर पानीमा वा पोखरीमा फोहर विसर्जन गर्नाले पोखरीको पानी प्रदुषित भई दुर्गन्धित हुन्छ । पवित्र सरोवर गंगा सागर, धनुष सागरमा फोहर गर्ने, माछा मार्ने र गंगाजललाई दुर्गन्धित गर्ने कुनै पनि किसिमको क्रियाकलाप कसैले गरे कारवाही गरिने स्थानिय प्रशासनले जनाएको छ ।

बुद्ध पुर्णिमाका दिन गंगासागरमा स्नान गर्दै भक्तजनहरु ।

हुन त नियमित सफाइ हुने गरेको उक्त गंगा सागरमा प्रत्येक शनिबार विहान ७ बजे देखि ९ बजेसम्म सघन रुपमा सफाई हुने गरेको छ । करिब २ सय ५० देखि ३ सय जना सम्म स्थानियवासीहरु उक्त सफाई कार्यक्रममा सहभागी हुने गरेको छ ।

गंगासागरमा गंगा माताको वृहत आरती प्रत्येक दिन गराउने योजना रहेको छ । उक्त आरती गंगासागरमा गरेको दृष्य हेर्न पर्यटकहरु समेत आउने यादवको विश्वास छ । गंगासागरलाई सौन्दर्यीकरण गर्न र पर्यटकहरुलाई आकर्षित गर्ने उद्देश्यले गंगासागरमा पर्यटक डुङगा चलाइने योजना रहेको छ ।

२०७१ जेष्ठ ०४ गते आईतबार

ए.डि.बी. बचाऔं–जनकपुर बनाऔं - मुरली मनोहर मिश्र

मुरली मनोहर मिश्र

(जनकपुर नागरिक समाज)

१. ५२ कुटी ७२ कुण्ड एवं सरोवरहरुको संगमस्थल तथा मिथिलाको पवित्र आँगन हाम्रो जनकपुर धामको जनकपुर नगरपालिका जहाँ उचित शारीरिक व्यामको अभाव, मोटोपनको समस्या, ह्दयरोग, मधुमेह, उच्च रक्तचाप, ह्दयघात, क्षयरोगहरुको साथै वायु प्रदुषण, मानसिक तनाव, धुम्रपान एवं मधपान, लागुऔषधको सेवन, हत्या एवं घरेलु हिंसा लगायत अस्वस्थ्य खान पीन र हरियो सागपात फलफुलको कमिको कारण जनकपुर नगरवासीको जीवन दिनानुदिन जोखिमपुर्ण बन्दै भइरहेको यथार्थ छ भने अर्को तर्फ जनकपुर नगरपालिकाको अव्यवस्थित शहरी वातावरण सामाजिक तथा भौतिक संरचनाहरुको कारण पनि नगरवासीहरुको स्वास्थ्यमा गम्भीर प्रभाव पारेको छ, जस्तै खानेपानीको अभाव, अव्यवस्थित दलनिकास, हावाको गुणस्तर वासस्थान तथा कार्यस्थलको अवस्था, स्वास्थ्य सेवाको उपलब्धता लगायत यसको श्रोत साधन माथिको पहुँचमा अभावका कारण नगरवासीहरुको जन स्वास्थ्यमा गम्भीर असर पडिरहेको कटु सत्य सर्वविदितै छ । अर्थात, जनकपुर नगरपालिका तीब्र शहरीकरणको कारण नगरपालिका आधारभुत संरचनाको विकास निर्माण कार्यमा एक्लै पडेको छ र अव्यवस्थित शहरीकरणको कारण जनकपुर नगरवासीहरुको मानवीय संकटमा दिनानुदिन बढोत्तरी भइरहेका कारण नगरवासीहरुको स्वास्थ्य समस्या ग्रामिण स्तरको तुलनामा अत्यधिक अनुमान बमोजिम अगामी सन् २०३५ सम्ममा गरिबीको मुख्य केन्द्र गाउँ नभई शहरीक्षेत्र हुने चेतावनी दिईसकेको छ ।

२. स्वास्थ्यपुर्ण जीवन व्यतित गर्न पाउनु प्रत्येक नागरिकको जन्मसिद्ध अधिकार रहेको हुँदा त्यसको प्रत्याभुतिको लागि व्यक्ति, समाज तथा स्थानिय निकायको समान भुमिका एवं दायित्व रहेको अनुभुति गर्दै यस पंक्तिकारद्वारा उपरोक्त उल्लेखित चुनौतिहरुको सामना गर्न ऐशियाली विकास बैंक एडिबीद्वारा जनकपुर नगरपालिकाको लागि ‘एकिकृत शहरी विकास आयोजना’ को प्रभावकारी कार्यान्वयनको लागि सर्वपक्षिय आग्रह एवं अनुरोध गर्न चाहन्छु ।

किनभने एडीबीद्वारा ‘एकिकृत शहरी विकास आयोजना’ को सफल एवं प्रभावकारी कार्यान्वयन भएमा जनकपुर नगरपालिकाको व्यवस्थित शहरी योजना शहरी जीवनयापनमा व्यापक सुधार गुणस्तरीय एवं सुन्दर सडक, व्यवस्थित दल एवं नाला तथा फोहोर व्यवस्थापनको दिर्घकालिन व्यवस्थापनले जनकपुर नगरवासीको स्वास्थ्य गुणस्तर गुणात्मक बृद्धि हुनेछ भन्ने यस पंक्तिकारको दृढ विश्वास छ । वायु प्रदुषण, ध्वनी प्रदुषण एवं जलप्रदुषणको न्यूनीकरण गर्नको लागि एडिबि को एकिकृत शहरी विकास आयोजना रामवाण हुनेछ ।

३. मात्र राजनीतिक दस्तावेजलाई बुँदा बनाएर सहमति पत्रको नामाकरण गरी हस्ताक्षर गर्दैमा अथवा एक जोडी परेवालाई कुनै विशेष समारोहमा उडाएर केवल शान्तिको कामना मात्र गर्न सकिन्छ तर विकास छैन । किनभने वास्तविक एवं दिर्घकालिन शान्ति केवल आर्थिक एवं सामाजिक विकासद्वारा मात्र सम्य हुन्छ भन्ने हाम्रो ठहर छ । दिर्घकालिन शान्तिको मेरुदण्ड नै दीगो विकास भएको हुँदा रुपान्तरण केवल शव्दमा होइन व्यवहार एवं कार्यान्वयनमा हुनुपर्दछ तथा रुपान्तरणको मुर्तरुप दिनसक्ने अवस्थाको प्रत्याभुति रुपान्तरणकारी सोच एवं अग्रगमण हुने हुँदा राष्टिूय एवं अन्तराष्टिूय परिस्थितिको समिक्षात्मक कार्यान्वयन सम्भव विकास निर्माणको मार्गचित्रलाई आत्मसात गर्दै भावी पिढीको लागि पनि विकासको गति समात्नु आजको अपरिहार्यता हो । राजनीतिलाई गँजेडीगफ बनाएर नत शान्तिको कामना गर्न सकिन्छ न त कुनै समुहलाई समेटदैमा शान्ति भित्रिन्छ । किनभने समाजिक न्याय एवं आर्थिक सम्भावना नहेरेसम्म अर्को असन्तुष्ट समुह खडा हुनमा धेरै समय लाग्दैन । शान्तिको लिखित दस्तावेजमा गरिएको हस्ताक्षरद्वारा हिंसाको अन्य बाँकी सम्भावनाहरुको अन्त्य कदापि गर्न सकिंदैन किनभने समग्र राष्टू एवं समाज अहिले पनि चरम गरिबी एवं असमानताकै दलदलमा रहेको हुँदा त्यसले हिंसा मचाउने खतरनाक समुहहरुको जन्माउन सक्छ ।

४. अतः हिंसाको जग भत्काउने उपयुक्त एवं अचुक अस्त्रको रुपमा रहेको दिर्घकालिन आर्थिक एवं समाजिक विकासलाई सम्भव पार्न राजनीतिक आर्थिक एवं सामाजिक तीनवटै चेतनामा दीर्घकालिन विकासलाई प्रधानता दिनुनै आजको अनिवार्य शर्तलाई आत्मबोध गर्दै एडीबिको एकिकृत शहरी विकास आयोजनाको कार्यान्वयनमा असमर्थ वा अनावश्यक झमेला गर्ने अमुक व्यक्ति समुह वा संस्थालाई राष्टिूय एवं स्थानिय तहबाट बहिष्कार तथा बहिरगमन हुन बाध्य पार्नसक्ने परिस्थिति एवं परिवेशको विकास गर्नु अनिवार्य शर्त बनेको छ ।

अर्कोतर्फ दिर्घकालिन शान्तिको मेरुदण्ड रहेको दिगो विकासको जनभावना गनकांक्षा एवं जनचाहनालाई आत्मसात गर्दै त्यसतर्फ जसले जिम्मेवारीपुर्वक सक्रियता लिएको छ वा लिन्छ त्यस्ता दृढ इच्छा शक्तिसहित स्पष्ट कार्ययोजना भएकाहरुलाई सामाजिक एवं राजनीतिक निर्णायक तहमा पु¥याउने वातावरण सिर्जना गर्ने गराउने कार्यमा यस पंक्तिकारको सर्वपक्षिय आग्रह एवं अनुरोध गर्नुको साथै सस्तो र मिठो कुरा गर्ने गफेडीहरुसँग दिगभ्रमित नहुन र अवउप्रान्त कसैको राजनीतिक मुद्धाको साटो सामाजिक एवं आर्थिक विकास निर्माणको मुद्धा हेरेर मात्र निर्णय लिन सम्बन्धित सबैमा यस पंक्तिकारको विनम्र आग्रह एवं अनुरोध छ ।

२०७१ जेष्ठ ०४ गते आईतबार

रद्द गरिएको एसएलसी परीक्षा पुनः लिइने

द एक्सक्लुसिभ सम्वाददाता

जनकपुरधाम............

रद्द गरिएको धनुषाको तीन परीक्षा केन्द्र मध्ये दुई परीक्षा केन्द्रमा पून ः परीक्षा सञ्चालन गर्न परीक्षा नियन्त्रण कार्यालय तयार भएको छ । विगत चैतमा सम्पन्न एसएलसी परीक्षाको क्रममा रद्द गरिएको समाजिक विषयको परीक्षा पून ः सञ्चालन गर्न परीक्षा नियन्त्रण कार्यालय तयार भएको हो ।

परीक्षा नियन्त्रण कार्यालयले यदुकुहाको परीक्षा केन्द्र ‘क’ र धवौली परीक्षा केन्द्रको परीक्षा पून ः सञ्चालन गर्न तयार भएपनि यदुकुहाकै परीक्षा केन्द्र ‘ख’ मा परीक्षा नलिइने जनाएको छ । कार्यालयले परीक्षाको मिति जेष्ठ १७ गतेको लागि निर्धारण गरेको जनाइएको छ । यसअघि रद्द गरिएको तीन परीक्षा केन्द्रमा पून ः परीक्षा सञ्चालन हुनुपर्ने माग गर्दै संयुक्त विधार्थी संघर्ष समिति करिब २० दिन देखि जनकपुरको जनक चोकमा रिले अनशन गर्दै आइरहेको थियो । संघर्ष समितिले पुनः परीक्षा लिन तयार भएपछि रिले अनशन पनि शुक्रबार तोडेको छ । यसअघि घटनाको छानबीन गर्न धनुषा आएका शिक्षा मन्त्रालयका सह(सहचिव खगराज बराल नेतृत्वको टोलीले परीक्षा बोर्डमा आफ्नो प्रतिवेदन बुझाएका थिए । विगत वर्ष चैत महिनामा सञ्चालन भएको एसएलसी परीक्षामा सुरक्षाकर्मी, विधार्थी र अभिभावक बीच विवाद हुँदा धनुषाको यदुकुहा विधालयमा रहेको परीक्षा केन्द्र ‘क’ ,  ‘ख’  र धवौली परीक्षा केन्द्र गरी तीन परीक्षा केन्द्रमा समाजिक विषयको परीक्षा रद्द गरिएको थियो । 

विवादको क्रममा प्रहरीले चलाएको गोली लागि दुई विधार्थी घाइते भएका थिए भने तीन परीक्षा केन्द्र गरी करिब एक हजार दुई सय विधार्थीको भविष्य अन्यौलमा परेको थियो ।

२०७१ जेष्ठ ०४ गते आईतबार

एमाले धनुषामा विवाद चर्किदै

द एक्सक्लुसिभ सम्वाददाता

जनकपुरधाम............

नेकपा एमाले धनुषाको जिल्ला कमिटिमा दुईवटा समानान्तर कमिटि गठन भएपछि उत्पन्न भएको विवाद अझै सम्म यथावत रहेको छ । एक पक्षले अहिलेको जिल्ला कमिटि विघटन भईसकेको भन्दै निर्वाचित कमिटिलाई मानिराखेका छैनन भने अर्को पक्षले निर्वाचित कमिटि नै बैधानिक रहेको दावी गरिरहेका कारण विवाद झन बढ्दै गएको छ । 

गत माघ ५ गतेको जनकपुर अञ्चल कमिटिको वैठकबाट एमाले विधान नियमावली अनुसार अनुशासनको कारवाही अन्तरगत एक तह माथिको निकायले एक तह तलको निकायलाई कारवाही गर्न सक्ने आधारमा जिल्ला कार्यसमिति धनुषालाई कारवाही स्वरुप विघटन गरेको थियो । जनकपुर अञ्चल कमिटिका इन्चार्ज केशव देवकोटाको अध्यक्षतामा बसेको अञ्चल कमिटिको पुर्ण वैठकले माघ ५ गते धनुषा जिल्ला कमिटि विघटन गरेको थियो । 

जिल्ला कार्यसमिति अत्यन्त अराजक भएको, उदण्ड भएको, पार्टीको नीति निर्देशन नमानेको, जनवादी केन्द्रियता संगठनात्मक सिद्धान्तको विपरित चलेको, अञ्चल कमिटिले पटक पटक सचेत गराउँदा पनि जिल्ला कार्यसमितिले अञ्चल कमिटिको निर्देशनलाई अटेरी गरेको, संविधानसभाको चुनावमा पार्टीका उम्मेदवार विरुद्ध जिल्ला अध्यक्ष हरिनारायण महत्तो खुल्लमखुल्ला लागेको भन्दै जिल्ला कार्यसमितिलाई विघटन  गरिएको थियो ।

 अञ्चल कमिटिले तदर्थ समिति गठन गर्न अञ्चल सचिवालयलाई दिएको अभिभारा अनुसार गत माघ १० गते राजकिशोर यादवको संयोजकत्वमा ८९ सदस्यीय तदर्थ कमिटि गठन गरिएको थियो । अञ्चल सचिवालयले गठन गरेको उक्त तदर्थ समितिलाई एमालेको केन्द्रिय समितिद्वारा अनुमोदन गराई कार्यान्वयनका लागि फागुन ८ गतेको पार्टीको स्थायी कमिटिद्वारा अनुमोदन समेत गराईसकिएको एमालेका बैकल्पिक केन्द्रिय सदस्य श्री प्रसाद साहले बताएका छन् । तर, केन्द्रिय सदस्य रघुवीर महासेठले केन्द्रका केही नेताहरुमाथि आफ्नो प्रभाव जमाई उक्त निर्णयलाई पुनः विचार गर्न अञ्चल कमिटिलाई निर्देशन दिलाएको साहले बताए । 

जिल्ला कमिटिका अध्यक्ष अञ्चल कमिटीमा पदेन सदस्य हुन्छन् तर जिल्ला कमिटि नै विघटन भएपछि महत्तोको पदेन सदस्य समेत खारेजी भएको अवस्थामा गठन गरिएको तदर्थ समितिमा महत्तोलाई पुनः अञ्चल कमिटि सदस्य मनोनयन गरिएको थियो । पार्टी केन्द्रको पुनः विचार गर्न दिइएको निर्देशन पश्चात अञ्चल कमिटिको चैत्र १० गते बसेको दोस्रो वैठकले पनि राजकिशोर यादवकै अध्यक्षतामा गठित तदर्थ समितिलाई बैधानिक बनाई अनुमोदन गराउन केन्द्रमा पठाइएको साहले बताएका छन् । यता ३० बैशाखमा हरिनारायण साहको अध्यक्षतामा जिल्ला समितिले गरेको पत्रकार सम्मेलनमा केन्द्रिय सदस्य रघुवीर महासेठले निर्वाचित कमिटि नै वैधानिक रहेको भन्दै अञ्चल कमिटिलाई निर्वाचित कमिटि विघटन गर्ने अधिकार नै नरहेको भन्दै अञ्चल कमिटिलाई उनले चुनौति दिए । मनोनित कमिटि भएको भए विघटन गर्न पनि सक्थ्यो तर अधिवेशनबाट निर्वाचित कमिटि भएका कारण विघटन गर्ने अधिकार नै अञ्चल कमिटिलाई नरहेको महासेठले बताए । 

यता महासेठले गरेको पत्रकार सम्मेलन आधिकारीक नरहेको बैकल्पिक केन्द्रिय सदस्य साहले दावी गरेका छन् । गत २२ बैशाखमा एमालेको केन्द्रिय कमिटिको बैठकमा समेत केन्द्रिय सदस्यहरु केशव देवकोटा, शत्रुधन महत्तो, योगनारायण यादव र लाल गोइत समेतले महासेठको आलोचना गर्दै संजय साहको संरक्षण गरेकोमा आपत्ति जनाएका थिए । उक्त कुराको जवाफ दिँदै महासेठले जनकपुरमा गरिएको पत्रकार सम्मेलनमा आफुले संजय साहको संरक्षण नगरेको र संजय साहको प्रवृतिको विरोधमा आफु रहेपनि आफ्नो चरित्र हत्या गर्ने प्रयास गरिएको महासेठले बताएका थिए । संजय साह चुनाव जित्ने वित्तिकै धन्यवाद दिन रघुवीर महासेठको घरमा पुगेको जगजाहेर रहेको भन्दै श्री प्रसाद साहले महासेठको पोल खुलिसकेको तथा जनतामा नाङ्गो भईसकेको बताए ।

 संविधानसभाको चुनावमा महासेठले संजय साहलाई जिताउन करोडौं रुपैयाँ ऋणको रुपमा सहयोग गरेको, एलेभेन्थ आवरमा संजय साहको पक्षमा भोट कास्ट गराउनका लागि महासेठले राम चरित्र साहलाई प्रयोग गरेको श्री प्रसाद साहले आरोप लगाएका छन् । क्षेत्रिय चुनाव परिचालन कमिटि यदुवंश झाको अध्यक्षतामा बसेको बैठकद्वारा पार्टीका उम्मेदवार विरुद्ध लागेका रघुवीर महासेठ, जुली महासेठ, राम चरित्र साह र अवधेष पोखरेललाई कारवाही गर्न अनुशासन आयोग समितिमा समेत प्रतिवेदन पठाइ सकिएको र उक्त प्रतिवेदन अहिले पनि विचाराधिन अवस्थामा रहेको साहले बताएका छन् । महासेठको कार्यक्षेत्र लोकतान्त्रिक मधेसी संगठन हो र उनले जनकपुरमा गरेको पत्रकार सम्मेलन बैधानिक नरहेको तथा उनले व्यक्त गरेका विचार पार्टीको नभई व्यक्तिगत रहेको साहले बताएका छन् । जनकपुर अञ्चल कमिटिको इन्चार्ज केशव देवकोटा, धनुषाको इन्चार्ज शत्रुधन महत्तो, महोत्तरीको इन्चार्ज योगनारायण यादव र सर्लाहीको इन्चार्ज श्री प्रसाद साह रहेको हुनाले कार्यक्षेत्र भन्दा बाहिरका व्यक्तिले पार्टीको धारणा राख्नै नसक्ने साहले दावी गरेका छन् ।

जिल्ला अधिवेशनबाट हरिनारायण महत्तोको अध्यक्षतामा गठित भएको कार्यसमितिका जिल्ला सचिव राज किशोर यादव विगतमा रघुविर महासेठकै पक्षमा थिए । 

तर अहिले अञ्चल कमिटिले महासेठकै गुटका राजकिशोर यादवको संयोजकत्वमा नयाँ तदर्थ समिति गठन गरिदिएपछि महासेठ एक्लिएका छन् । रामचन्द्र झा एमालेमा हँुँदा महत्तो र यादव महासेठ गुटमा थिए । तर एमालेबाट झाको वहिरगमन पछि प्रवेश गरेका केन्द्रिय सदस्यहरु रत्नेश्वरलाल गोइत, यदुवंश झा समेत योगनारायण यादव, शत्रुधन महत्तो र श्री प्रसाद साह एउटा गुटमा संगठित भएका छन भने महासेठ एक्लिएका छन् । महासेठ एक्लिएपनि महासेठ पक्षका नेताहरुको जिल्ला कार्यसमितिमा बहुमत रहेको दावी गर्छन् । एमालेमा यो रोग पहिले देखि नै रहँदै आएको छ । यस अघिपनि रघुविर महासेठले समानान्तर कमिटि बनाएको इतिहासलाई महासेठ बेगरका गुटले सोही प्रवृति दोहोर्याएका छन् । केन्द्रले पनि विवाद साम्यपार्नुको सट्टा दुवै गुटलाई आश्वासन बाँटेका छन् । एमालेको आसन्न केन्द्रिय महाधिवेशनलाई दृष्टिगत गर्दै भोटका लागि विवाद साम्यपार्नुको सट्टा अल्झाएर राख्नमै फाइदा देखेकाले विवाद दिन प्रतिदिन वढ्दै गएको एमालेका स्थानिय नेताहरुको भनाई छ ।

२०७१ जेष्ठ ०४ गते आईतबार

सञ्चार उद्यमि सिँघानियाको हत्यामा थुप्रै स्थानीय नेताहरुको संलग्नताको आशंका

द एक्सक्लुसिभ सम्वाददाता
जनकपुरधाम............

सञ्चार उद्यमी अरुण सिँघानियाको हत्या घटनाको पाटोसमेत सञ्जयकुमार साह र उनका निकट सहयोगीसँग भिडिने सम्भावना रहेको प्रहरीले आशङ्का गरेको छ । हत्यामा प्रयोग गरिएका प्रमुख सुटर पक्राउ परेपछि उनले दिएको बयानका आधारमा साहका निकट सहयोगीमाथि प्रहरीले अनुसन्धान सुरु गरेको छ । धनुषाको वीरेन्द्र बजारका विनोद यादवको हत्यामा संलग्न रहेको अन्सी राइन पक्राउ परेपछि प्रहरीले उनको बयानको आधारमा अनुसन्धान गर्दै जाँदा हत्यामा सुटरका रुपमा प्रयोग गरिएका वीरेन्द्र बजारका एकवाल भनिने योगेन्द्र सहनीलाई पक्राउ गरेर अनुसनधान सुरु गरेको छ ।
सिँघानियाका पुत्र राहुलसमेतको जाहेरी र वादी नेपाल सरकार र प्रतिवादी सहनीलाई जिल्ला अदालत धनुषाबाट पाँचदिने म्याद थप गरी अनुसनधान सुरु गरिएको हो । अन्सी राइनले गरेको बयानको आधारमा प्रहरीले सो घटनामा साहका निकट रहेका सद्भावना पार्टीका केन्द्रीय सदस्य रहेका कनकपट्टी(१ घर भई हाल जनकपुर(१ बस्ने ३५ वर्षिय रामविनोद यादव, फोरम (लोकतान्त्रिक)का जिल्ला उपाधयक्ष समेत रहेका भरतपुर(८ का वर्ष ३० को चन्द्रदीप यादव रहेका छन् । त्यसैगरी भरतपुर(१ का विजय कुसैत भनिने दीपेन्द्र कुमार यादव, भरतपुर मालटोलका टेकबहादुर लामा र  उमाप्रेमपुरका मनक लामाको खोजी गरिरहेको छ । प्रहरीले उनीहरुको सो घटनामा संलग्नता हुन सक्ने जनाएको छ ।  जिल्ला प्रहरी कार्यालय धनुषाका प्रहरी उपरीक्षक उत्तमराज सुवेदीले सिँघानिया हत्याको अनुसन्धान भइरहेको र फरार अभियुक्तको खोजी भइरहेको जानकारी दिए । १७ फागुन २०६६ मा फागु पुर्णिमाको दिन होलि खेल्ने बाहानामा जनकपुरको शिव चौकमा सिंघानियालाई गोली प्रहार गरी हत्या गरिएको थियो । सिंघानियाको हत्या किन गरिएको र उक्त हत्या योजनामा थप अन्य को(को सम्बन्ध रहेको कुरामा अनसारीले सिंघानियाको हत्या किन भएको भन्ने थाहा नभएपनि जनकपुरका प्रतिष्ठित व्यक्तिको निर्देशनमा भएको बताएका छन् । उक्त प्रतिष्ठित व्यक्तिबारे आफुलाई थाहा नभएको तथा फरार रहेका राम विनोद यादव र चन्द्रदीप यादवलाई थाहा हुनुपर्ने अन्सारीले प्रहरीलाई बयान दिएका छन् ।

२०७१  बैशाख २८ गते  आईतवार

हातहतियार मुद्दा पनि संजयको लागि ‘घाँडो’

द एक्सक्लुसिभ सम्वाददाता
जनकपुरधाम............
३ जेठ २०६० मा धनुषाको सखुवा महेन्द्रनगरमा हातहतियार देखाई स्थानिय व्यक्तिहरुलाई लुटपाट गर्न खोजेको राम जिवन प्रसाद गुप्ताको जाहेरीमा संजय साहलाई जिल्ला प्रशासन कार्यालय धनुषाले सजाय र जरिवाना समेत गरिसकेको छ । गुप्ताको जाहेरीमो संजय कुमार साह, उमाशंकर अरगरिया, संतोष कुमार साह, शम्भु यादव, विनोद यादव, रामबाबु भनिने विन्देश्वर साह, राज कुमार पुर्वे, श्याम शर्मा, धर्मेन्द्र पाठक, अनिल भनिने निर्मल कुमार सिंह, ओम प्रकाश यादवलाई प्रतिवादी बनाई हातहतियार तथा खरखजाना र सार्वजनिक अपराधको मुद्दा चलाइएको थियो । प्रहरी प्रतिवेदन अनुसार हातहतियार र खुकुरी समेत बोकी हो हल्ला गरी हिड्ेको अवस्थामा खान तलासी गर्दा संजय कुमार साहको साथबाट खुकुरी थान १, कक भएको नाइन एमएम ११ राउण्ड लेखेको नम्बर १७४० लेखेको पेस्तोल थान १ गोली लोड भएको अवस्था बरामदी गरिएको तत्कालिन प्रहरी निरीक्षक मोहन कुमार शेर्पाको प्रतिवेदनमा उल्लेख छ । सोही मुद्दामा धनुषाका तत्कालिन प्रमुख जिल्ला अधिकारी रेवती राज काफ्लेले ३० अषाढ २०६१ मा संजय साहलाई १ वर्ष ९ महिना कैद र पाँच हजार रुपैयाँ जरिवाना सजाय तोकेको थियो । उक्त फैसलाका विरुद्ध पुनरावेदन अदालत जनकपुरमा पुनरावेदन गर्दा न्यायाधिशद्वय गिरीराज पौडयाल र भोला प्रसाद खरेलको संयुक्त इजलासले ३० जेठ २०६३ मा जिल्ला प्रशासन कार्यालय धनुषाको फैसलालाई सदर गर्दै सफाइ पाउनु पर्ने पुनरावेदकको निवेदन निरर्थक भएको फैसला गरेको थियो । त्यसपछि सोही निर्णय विरुद्ध सर्वोच्च अदालतमा २०६८ सालमा फैसला बाझिएको थियो । सर्वोच्च अदालतका स्थायी न्यायाधिश अवधेष कुमार यादवले पुनरावेदन अदालतको फैसलालाई सदर गरेको थियो भने अस्थायी न्यायाधिश कमल नरायण साहले प्रतिवादी संजय साह निर्दोष रहेको भनी पुनरावेदन अदालतको निर्णय विपरित राय बझाएको थियो । सर्बोच्च अदालतमा राय बझेपछि अहिले उक्त मुद्दा पुर्ण बेन्चमा विगत ५ महिना देखि अड्किएको छ ।
मुद्दा फिर्ताको प्रयास
संजय साह फोरम लोकतान्त्रिक पार्टीका केन्द्रिय सदस्य भई भौतिक योजना तथा पुर्वाधार निर्माण राज्य मन्त्रि भएको बेलामा आफु विरुद्ध षडयन्त्र गरी हातहतियार तथा खरखजाना मुद्दा र सार्वजनिक अपराध मुद्दामा फसाइएको भन्दै मुद्दा फिर्ताका लागि उनले गृह मन्त्रालयमा निवेदन दिएका थिए । २९ बैशाख २०६७ मा राज्य मन्त्रि साहले राज्य मन्त्रिकै लेटरप्याडमा गृहमन्त्रि विजय कुमार गच्छदारलाई मुद्दा फिर्ता पाउँ भनी चलानी नम्बर ११०÷०६६÷०६७ मा पत्र लेखेका थिए । गच्छदार त्यतिबेला साहको पार्टी अध्यक्ष पनि थिए । त्यसपछि गृह मन्त्रालयको लेटरप्याडमा राय प्रतिवेदन पेश गर्नको लागि जिल्ला प्रशासन धनुषामा समेत पत्र पठाएका थिए । उक्त पत्र १७ जेठ २०६७ मा गृहमन्त्रालयले कानुन तथा न्याय मन्त्रालयमा समेत च.नंं. २७८ को पत्र पठाएका थिए । उक्त पत्रको जवाफमा १९ जेठ २०६७ मा कानुन मन्त्रालयले फौजदारी मुद्दाहरु फिर्ता लिने सम्बन्धमा अपनाउनुपर्ने नीतिगत मापदण्ड र कार्यविधि २०५५ को मापदण्डको प्रकरण ५ बमोजिम सुरु अदालतबाट निर्णय भइसकेका वा पुनरावेदन तहमा विचाराधिन रहेका मुद्दा फिर्ता लिन सकिने व्यवस्था नरहेको हुँदा सर्बोच्च अदालतमा विचाराधिन रहेको उक्त मुद्दा फिर्ता लिन नसकिने राय सहितको पत्र गृह मन्त्रालयलाई फर्काएको थियो ।


२०७१  बैशाख २८ गते  आईतवार

पाएनन् संजयले राहत

द एक्सक्लुसिभ सम्वाददाता

जनकपुरधाम............

केही महिना अघिसम्म मात्र संविधानसभाको दोस्रो निर्वाचनमा दोस्रो पटक धनुषाबाट सभाषद बनेका संजय कुमार साह अहिले प्रहरीको थुनामा छन् । कानुन बनाउने दायित्व पाएका साह हत्या अभियोगमा मुद्दा पुर्पक्षका लागि अदालतद्वारा जलेश्वर कारागार चलान गरिएपनि अहिले उनी जिल्ला प्रहरी कार्यालय महोत्तरीको हिरासतमा थुनिएका छन् ।
    संजय साहलाई जलेश्वर कारागारमा राख्न जलेश्वर जेल प्रशासनले इन्कार गरेपछि जिल्ला प्रहरी कार्यालय महोत्तरीमा राखिएको छ । राति ८ बजे साहलाई धनुषाका करिब ५० जना सुरक्षाकर्मीले जलेश्वर कारागार पुरयाउँदा त्यहाँ जेलर सोभेन्द्र ठाकुर उपस्थित थिएनन् । केही समय पछि आएका जेलर ठाकुरले राति ८ बजे कारागारको कोठा खोल्ने वा नखोल्ने भनेर महोत्तरीका प्रमुख जिल्ला अधिकारी र प्रहरी उपरीक्षक समेतलाई उनले सोध्दा सम्भव नभए नराख्न जवाफ पाएको ठाकुरले द एक्सक्लुसिभलाई बताएका छन् । जेलर ठाकुरका अनुसार संजय साहको सुरक्षाका लागि सुरक्षाकर्मीको अभावका साथै कोठा, शौचालय र खानेपानीको अभाव देखिएको हुनाले निज संजय साहलाई आफुले जलेश्वर कारागार भित्र राख्न असमर्थ भएको जनाउँदै जिल्ला प्रहरी कार्यालय धनुषालाई पत्र फिर्ता पठाएका थिए । संजय साहलाई एउटा छुट्टै कोठामा राख्नुपर्ने हुनाले कोठाको अभाव भएको उनले बताए । हाल उक्त कारागारमा १ सय ३५ कैदी अटाउने क्षमता रहेपनि कुल ५ सय जना कैदी बन्दीहरु रहेको जेलर ठाकुरले बताएका छन् । उक्त सम्बन्धमा संजय साहलाई कहाँ पठाउने हो भन्ने सबालमा धनुषाका प्रहरी उपरीक्षक उत्तम राज सुवेदीले आइतवार अदालत खुलेपछि अदालतले दिने निर्देशन अनुसार बैकल्पिक उपाय खोजिने द एक्सक्लुसिभलाई बताएका छन् । आइतवारसम्म उनलाई जिल्ला प्रहरी कार्यालय महोत्तरीको थुनुवा कक्षमा नै राखिने सुवेदीले बताए ।
    सदभावना पार्टीका वरिष्ठ उपाध्यक्ष रहेका निलम्बित सभासद सञ्जय कुमार साहलाई धनुषा जिल्ला अदालतले बिहिबार पूर्पक्षका लागि थुनामा राख्ने आदेश दिएको हो । मिथिला राज्यको माग गर्दै शान्तिपूर्ण धर्ना दिइरहेको स्थलमा बम बिष्फोट गराई पाँच जनाको हत्या गराउनुका साथै ३२ जनालाई घाइते बनाएको घटनाको मुख्य योजनाकारको अभियोगमा जिल्ला प्रहरी कार्यालय धनुषाले साहलाई पक्राउ गरी अदालतमा उपस्थित गराउँदा २५ बैशाखमा जिल्ला अदालतका न्याया्धिश कैलाश केसीले उनलाई पूर्पक्षका लागि थुनामा राख्ने आदेश दिएका छन् । जिल्ला अदालतमा पोल गर्ने सह अभियुक्तहरुले दिएको बयानमा पुर्नविचार गर्नुपर्ने अवस्था नदेखिएको तथा अहिलेलाई यी प्रतिवादी संजय साह कसुरवार होइनन् भन्ने विश्वास गर्ने मनासिव आधार नदेखिएकोले थप प्रमाण बुझदै जाँदा ठहरे बमोजिम हुने नै गरी प्रतिवादी संजय साहलाई मुद्दाको पुर्पक्षको लागि थुनाको पुर्जी दिई थुनामा राख्न जलेश्वर कारागारमा पठाइदिनु भन्ने आदेश अदालतले गरेको हो ।

संजय साहलाई तारेखमा रिहाको माग गर्दै तिनका समर्थकहरु धनुषा जिल्ला अदालत अगाडी प्रदर्शन गर्दै ।

अदालतमा सह अभियुक्तलाई संजय साहले चिनेनन्
जनकपुर बम काण्डका अन्य सह अभियुक्तहरु अर्जुन सिंह भन्ने मुकेश चौधरी र ओम प्रकाश यादवलाई मुख्य अभियुक्तको रुपमा अदालतमा उपस्थित गराइएका संजय साहले नचिनेको बयान दिएका छन् । जिल्ला न्यायाधिश कैशाल केसीको इजलासमा प्रतिवादी संजय टक्ला भन्ने संजय कुमार साहले गरेको बयान अनुसार प्रतिवादी मध्येका ओम प्रकाश यादवलाई निजको अनुहार हेरे भने मात्र चिन्न सक्ने बयान दिएका छन् । निज यादव विगतमा आफ्नो पार्टीमा रहेपनि दोस्रो संविधान सभाको निर्वाचन का लागि भएको नोमिनेशन भन्दा ठीक दुई दिन अगाडी निज ओम प्रकाश यादवले मेरो पार्टी छाडी नेपाली कांग्रेस पार्टीमा गएको साहले बयान दिएका छन् । जनकपुर बम काण्ड भएका दिन आफु काठमाण्डौमा रहेको र उक्त घटनाको राजन मुक्तिले जिम्मा लिएको भन्ने कुरा समाचार माध्यमबाट थाहा पाएको साहले बयान दिएका छन् ।
    बम घटना भएका दिन ८ बजे तिर आफ्नो घरबाट पार्टी कार्यालयमा गई बैठक बसेको र त्यहाँबाट साँढे एगारह बजे निस्केपछि आफ्नो गार्डले बम काण्डबारे जानकारी गराएको थियो । उक्त घटनाबारे यथार्थ पता लगाई काठमाण्डौ एयरपोर्टमा पुग्दा अन्य नेताहरु पनि रहेको र त्यहाँ प्लेन हेलिकप्टरबाट आएका घाइतेहरुलाई अस्पताल पुरयाउने काम गरी बेलुका आफ्नो घर फर्केको साहले बयान दिएका छन् । आफु जन प्रतिनिधि भएको कारण एक दिनमा सेकडौं फोन आउने गरेका कारण उक्त दिन आफुले क(कसलाई फोन गरेको याद नरहेको साहले बताएका छन् । उक्त दिन ९८५४०२०२०७ नम्बरको मोबाइल प्रयोग गरेको, र घटना अघि र आजसम्म पनि सोही नम्बर प्रयोग गरेको बताएका छन् ।
२०६९ साल अषाढ महिनासम्म आफ्नो र जिवनाथ चौधरीसँग चिनजान नरहेको, एक जनप्रतिनिधिको हैसियतले तत्कालिन एलडिओ केदार बहादुर बोगटीसँग भेट गरी भ्रष्टार गर्ने कर्मचारी उपर कारवाही गर्नुपर्छ भनी आग्रह गर्दा १८÷१९ जना माथि कारवाही भयो । निलम्बनमा पनि परे । सोही समयमा कर्मचारीहरुको डेलिगेशन आफु कहाँ आउँदा त्यसमा जिवनाथ चौधरी पनि थिए । त्यतिबेला मैले तपाईहरु लोकल मान्छे हो, जिल्लामा विकास गर्नुपर्छ भनेको थिएँ ।
    जिवनाथसँग मेरो कुनै रिसइवी थिएन र छैन । म मुकेश चौधरीलाई चिन्दैन । निज २०६३ साल देखि नै भुमिगत भएको भनी आफैले बयानमा लेखाएको छ । जुन मानिसलाई म चिन्दिन त्यस्ता व्यक्तिसँग मैले कुनै किसिमको योजना कसरी बनाउन सक्छु ? आफु सभाषद भएको एक जन प्रतिनिधि भएको व्यक्तिले कसैको हत्या गराउन योजना बनाउन पैसा दिन कार्य गर्न सक्दैन । म फेरी मानव अधिकार प्रति पुरै जिम्मेवार व्यक्ति हुँ । मुकेश चौधरीले प्रहरीमा गरेको म विरुद्धको बयान झुठा हो । निजले बयानमा उल्लेख गरेको मोवाईलको सिम मेरो होइन । कसको हो त्यो पनि थाहा छैन । मुकेश चौधरीलाई रु. ५ लाख दिएको छैन । ओम प्रकाश को हो म चिनेको छैन । निज ओम प्रकाशले मुकेशलाई रकम दिए नदिएको सम्बन्धमा पनि मलाई थाहा छैन । मैले कसैलाई पनि रु ५ लाख, १० हजार र ५ हजार रकम दिएको छैन ।
पुराना आरोपहरुबाट पनि साहद्वारा अस्वीकार
संजय साह माथि विगतमा केही व्यक्तिको हत्या,अपहरण तथा फिरौती लगायतका घटनाहरुको आरोपबाट पनि संजय साहले इन्कार गरेका छन् । आफ्नो चालक नन्द कुमार राउतलाई घाँटी थिचि हत्या गरेको अभियोगमा उनी उपर ज्यान मुद्दा पुनरावेदन अदालतमा समेत विचाराधिन अवस्थामा रहेको सवालमा उनले आफ्नो चालकको हत्या नगरेको बताएका छन् । नन्दु राउत आफ्नो डाइभर रहेको र अत्यिधिक मादक पदार्थ सेवन गरेर बान्ता  गरी अन्नको टुक्रा (दाना) घाँटीको टूेकियामा अड्केर मृत्यु भएको पोष्टमार्टम रिपोर्टले नै पुष्टि गरेको साहले बयान गरेका छन् । जसबारे चिकित्सा शास्त्रले भनेको छ टूेकियामा अन्नको दाना सरकाउने कार्य कुनै पनि व्यक्तिले गर्न नसक्ने इश्वरीय कारण वा संयोगवस मात्र हुने भएपनि आफुले प्रहरीको आर्थिक वारगेनिङको कारण ज्यान मुद्दा झेल्नुपरेको साहले बयान दिएका छन् । महोत्तरी जिल्ला धिरापुर गाविसका तत्कालिन अध्यक्ष हेमचन्द्र यादवको छोरा पप्पु यादव (राहुल)लाई २०५७ चैत्र १७ गते अपहरण गरी १० लाख रुपैयाँ फिरौती लिएर छोडेको आरोपलाई पनि साहले खण्डन गरेका छन् । किशोर अवस्थामा आफु माथि जिउँ मास्ने, बेच्ने मुद्दा लगाई किशोरा अवस्थानै समाप्त पार्ने षडयन्त्र तहत उक्त आरोप लगाइएको साहले बताएका छन् । त्यतिबेला रा.रा.बका विद्यार्थी नेता रामदयाल यादव र उसको आफन्त पर्ने गाउँका हेमचन्द्र यादवका छोरा पप्पु यादवलाई आपसी विवादका कारण सिरहा जिल्लामा लगेका थिए । त्यहाँबाट बच्चा सहित एक दुई जना व्यक्तिलाई पक्राउ गरी धनुषा प्रहरीमा बुझाइएको थियो ।
    पक्राउ परेपछि एक दुई सम्म पारिवारिक विवाद मिलाउने प्रयास पनि भयो तर, पछि एकाएक प्रहरीले उक्त बच्चा भारतको देउधा (मधुवनी जिल्ला)बाट पक्राउ गरी नेपालको धनुषा प्रहरीलाई पेपर सहित बुझाएको भनी कागजात तयार गरी जिउँ मास्ने, बेच्ने मुद्दा दर्ता गरिएको थियो । साहका अनुसार सिरहा प्रहरीलाई त्यहाँबाट पक्राउ गरी बुझाएको भनी पत्र कसैलाई नदिन लगाई झुठा मुद्दामा फसाइएको थियो । केही महिना नवित्दै सिरहा जिल्ला प्रहरी उक्त बच्चा र व्यक्तिहरुलाई हामीले पक्राउ गरी जिल्ला प्रहरी कार्यालय धनुषालाई जिम्मा लगाएको भनी धनुषा जिल्ला अदालतलाई पत्र पठाई दिँदा पुरा मुद्दा झुठा सावित भई खारेज भएको साहले बयान दिएका छन् ।     तराई जनतान्त्रिक पार्टी मधेसको बरिष्ठ सल्लाहकार रहेको उक्त पार्टीका अध्यक्ष मुकेश चौधरीले अदालतमा दिएको बयानको सबालमा पनि साहले खण्डन गरेका छन् । भुमिगत समुहहरुको आपराधिक क्रियाकलापको विरोध गर्दा र त्यसका विरुद्ध विज्ञापन समेत छपाउन लगाउँदा उनीहरुले आफुलाई गद्दार सावित गर्दै भौतिक कारवाही गर्ने समेत धम्की दिएको कारण मुकेश चौधरीले आफुलाई फसाउन खोजेको साहले बयान दिएका छन् ।
    साहलाई थुनामा रहुञ्जेल सम्मका लागि संसद र संसद सुबिधाबाट सभामुख सुभाष नेम्वाङले निलम्बन गरिसकेका छन । २० बैशाख शनिबार राती प्रहरीले उनलाई पक्राउ गरेको थियो ।
    पक्राउ परेका साहलाई प्रहरीले आइतबार नै अदालतमा हाजिर गराएपछि सोमबारदेखि साहको वयान र थुनछेकको बहस सुरु भएको थियो । प्रहरीले साहलाई रामानन्द चोकमा भएको बम बिष्फोटको मुख्य योजनाकार रहेको प्रमाण सहित अदालतमा उपस्थित गराएका थिए । जिल्ला प्रहरी कार्यालय धनुषाले उनलाई चैत ३ गते फरार अभियुक्त घोषणागरि पक्राउ पुर्जी जारी गरेको थियो ।
    जिल्ला अदालत धनुषाले पनि साह बिरुद्ध पक्राउ पुर्जी जारी गरेको थियो ।
साह धनुषा जिल्लाको निर्वाचन क्षेत्र नम्बर ४ बाट दोस्रो संबिधान सभा चुनावमा पनि निर्वाचित भएका थिए । उक्त घटनामा अन्य ७ जना यस अघि नै पूर्पक्षका लागि थुनामा राखिएकोछ । उक्त घटनामा पक्राउ परेका सबै साहका सहयोगी रहेको प्रहरीले दाबी गरेका छन । उनी पहिलो संबिधान सभामा मधेशी जनअधिकार फोरम नेपालबाट निर्वाचित भएका थिए । तर पटक पटक उनी दल परिवर्तन गर्दै पछिल्लो पटक सदभावना पार्टीमा प्रवेश गरेका थिए । उनलाई बचाउन सदभावनाका अध्यक्ष राजेन्द्र महतो लगायत जिल्ला तहका नेता कार्यकर्ताहरु सकृय थिए ।साह स्वयंलेपनि आफू निर्दोष भएको दाबीगर्दै आएका थिए ।

२०७१  बैशाख २८ गते  आईतवार