गाविस सचिवद्वारा समाजिक सुरक्षाको करोडौं रकम हिनामिना

एक्सक्लुसिभ सम्वाददाता
जनकपुरधाम............
सामाजिक सुरक्षा कार्यक्रम अन्तरगत वितरण गर्न गाविस सचिवहरुले लगेको पेश्की रकम हिनामिना गरे पनि सम्बन्धित निकायले कुनै कारवाही नगर्दा भ्रष्टाचार बढदै गएको छ । धनुषा जिल्लाका १ सय १ गाविसहरु तथा जनकपुर नगरपालिकाका १६ वडाका गाविस सचिवहरुले विगत दुई आर्थिक वर्षमा लगेको करिव २५ देखि ३० करोड रुपियाँ सम्मको फर्छयौट नगरी हिनामिना गरेका जिल्ला विकास समिति धनुषाको तथ्याङ्कले देखाउँछ ।
हंसपुर कठपुल्लाका गाविस सचिव भरत पजियारले गत वर्ष ०६६÷०६७ मा २२ लाख ८४ हजार तथा हाल कार्यरत गाविस सचिव सरोज मिश्रले ०६७÷०६८ मा ८ लाख ९३ हजार रुपियाँको फर्छयौट गरेका छैनन् । त्यसै गरी तल्लो, गोदारका गाविस सचिव जितेन्द्र लाल कर्ण (हाल अवकास प्राप्त) ले ०६६÷०६७ मा लगेको २२ लाख ९५ हजार रकम मध्ये करिब १० लाख रुपियाँको फर्छयौट गरेका छैनन् । सोहि गाविसमा कार्यरत हालको सचिव छेदी ठाकुरले १२ लाख ६३ हजार रुपियाँको फर्छयौट गरेका छैनन् । दुवरकोट हथलेटवा गाविसका सचिवले लगेको १९ लाख १८ हजार रुपियााको हिसाव फर्छयौट गरेका छ्रैनन् । धवौलीका गाविस सचिव महेन्द्र यादवले ०६५÷०६६ मा लगेको १३ लाख ९३ हजार, भरतपुरका गाविस सचिव देवकुमार गोहिवारले ०६५÷०६६ लगेको रु. १९ लाख, बरमझियाका सचिव देवकुमार गोहिवारले लगेको २६ लाख १७ हजार रुपैयाँ हालसम्म फर्छयौट नगरी अनियमितता गरेका छन् ।
सखुवा महेन्द्रनगरका गाविस सचिव रामपुकार यादवले लगेको कुल ४९ लाख ४५ हजार रकम, खजुरी चन्दाका गाविस सचिव राजराम मण्डलले लगेको १९ लाख २७ हजार, जिवछ चन्द्र मिश्रले लगेको ८ लाख २३ हजार, उमाप्रेमपुरका गाविस सचिव भोगेन्द्र साहले लगेको ४७ लाख १२ हजार रकम तथा हठिपुर, हडवारा, विसरभोरा सचिव नागेश्वर यादवले लगेको १६ लाख रुपैया फर्छयौट नगरी हिनामिना गरेको जिविस श्रोतको भनाई छ ।
सामाजिक सुरक्षा वितरण गर्नका लािग गाविस सचिवले लगेको पेश्की रकम वितरण नगरवेको खण्डमा १० प्रतिशत ब्याज समेत असुल गर्ने कानुनी प्रावधान छ तर सम्बन्धित निकायले त्यस्तो कनै पहल नै गरेका छैनन् । ३५ दिन भित्र गाविसमा गएको पेश्की फर्छयौट हुनु पर्ने नियम भए पनि नियम कानुनलाई ताकमा राखेर गाविस सचिवहरुले रकम हजम गर्ने गरेका छन् । जनकपुर नगरपालिकामा मात्र २ करोड ४० लाख रुपियाँ वडा सचिवहरुले हजम गरेका छन् ।
आर्थिक वर्ष ०६७÷०६८ मा गासि सचिवहरुले सामाजिक सुरक्षा भत्ता वितरण गर्ने नाउँमा लगेको रकम मध्ये हाल सम्म २५ प्रतिशत रकम मात्र फर्छयौट भएको तथा ७५ प्रतिशत रकम हिनामिना भएको जिविस श्रोतको दावी छ । आर्थिक वर्ष ०६७÷०६८ मा धनुषाका १ सय १ गाविस तथा जनकपुर नगरपालिका समेत गरी ८ महिनामा १० करोड ५६ लाख रुपियाँ सचिवहरुले पेश्कीको रुपमा लगेका छन् ।

मिति ः २०६८ अषाढ १२ गते