मैथिली फिचर फिल्म ‘मुखियाजी’को रेकर्डिङ जनकपुरमा

एक्सक्लुसिभ सम्बाददाता
जनकपुरधाम...........
निर्माण मोसन फिक्चर्स प्रा.लि.को ब्यानरमा बन्न गइरहेको मैथिली फिचर फिल्म ‘मुखियाजी’ को रेकर्डिङ जनकपरमा जोरतोरका साथ भैरहेको छ । फुल लेन्थ ३५ एम.एम.फिचर फिल्म ‘मुखियाजी’को छायाँकन कार्य भारतको मधुवनी, झँझारपुर तथा नेपालकै महोत्तरीको सुगा गाउँका स्थानहरुमा गत जनवरीमा सम्पन्न भए पछि जनकपुर स्थित एक रेडियोमा रेकर्डिङको कार्य एक साता देखि प्रारम्भ भएको छ । करिब ३५ लाख भारतीय रुपियाँको अनुमानित लागतमा बनिरहेको फिल्म ‘मुखियाजी’ आगामी १ अशोज तथा १७ सेप्टेम्बरका दिन दर्शक सामु आउने बताइएको छ । यस अघि पनि विभिन्न रङ्गमञ्च तथा सिनेमामा काम गरी सकेका जनकपुरका चर्चित कलाकारहरुले उक्त फिल्ममा अभिनय गरेका छन् । सुभाष चन्द्र मिश्रा, रोशनी झा, विकी चौधरी, रामनारायण ठाकुर, विष्णुकान्त झा, रंजु झा रामसेवक ठाकुर, ज्ञानी राउत, घनश्याम मिश्र, वि.एम. पटेल, परमेश झा, अमृत शर्मा लगायतका कलाकारहरुले उक्त फिल्ममा अभिनय गरेका छन् । सिनेमामा एउटा आइटम साग (विशेष गीत), भजन पान तथा मोबाइलको महत्व र प्रेम प्रसंगका रोमान्टिक गीतहरु समेत ७ गीतहरु रेकर्ड भएका छन् । नेपालकै बहुप्रतिष्ठित जगदम्बा श्री पुरुस्कारले सम्मानित डा. राजेन्द्र विमलको गीतमा प्रवेश मल्लिक, नेहा प्रियदर्शिनी, ललित, मो.फहिम सहितका गायक–गायिकाले स्वर दिएका छन् भने सुनिल–प्रवेश संगीत निर्देशक छन् । फिल्मका निर्माता रुपेश मिश्र छन् भने विकास झाले निर्देशन दिएका छन् ।
ग्रामिण परिवेशमा सेट–अपका बावजुद आधुनिकताको पहिचान सँगै परिवर्तित परिवेशलाई फिल्म ‘मुखियाजी’ मा देखाइएको छ । हास्य–व्यङ्ग्यका साथै समाजमा व्याप्त कुरीति, भ्रष्टाचार, घुसखोड़ी, प्रौढ शिक्षा, सर–सफाई, स्वास्थ्य सहित भावनात्मक सन्देश फिल्मका माध्यमले देखाउन खोजेको फिल्मका अभिनेता सुभाषचन्द्र मिश्राको भनाई छ । फिल्ममा मुखियाजी एउटा चारित्रीक पात्र मात्र हो, मुखियाजी राजनीतिक व्यक्ति नभए पनि गाउँमा मुखियाजी बन्न राजनीतिक वातावरण निर्माण हुन्छ त्यसैको इर्द–गिर्दमा सिनेमा अगाडी बढ्छ भन्दै निर्देशक विकास भन्छन्, “कस्सिएको पटकथा, प्रभावी सम्बाद तथा उच्चतम प्रविधिको प्रयोग सहितले फिल्मको क्वालिटी राम्रो भएकोले दर्शकले असाध्यै मन मराउनेछन्  ।
‘गर्मी काका’, ‘फिरन भाई’ चरित्रका किरदान निर्वाह गरेका नयाँ कलाकारहरुले अपेक्षा भन्दा पनि राम्रो प्रदर्शन गरेको तथा नयाँ एवम पुरानो कलाकारलाई एक ठाउँमा परिस्थितिको विपरीत माहौलमा सामञ्ज्यस्ता बनाएर अगाडी बढ्दा चुनौतिको सामना गर्नु परेको निर्देशक झाको भनाई छ । ‘बाप काटे
 घास आ बेटा कालिदास’, ‘बाप पोखरी कात आ बेटा सिमरिया घाट’ सहितका सम्वादहरुले दर्शकलाई भरपुर मनोरञ्जन प्रदान गर्ने निर्देशक विकासले दावी गरेका छन् ।
मैथिली फिल्मको दर्शक ४ करोड भन्दा बढी व्यस्क भएको बेला अत्यन्तै स्कोप रहेको भए पनि गुणस्त्तर, बजार व्यवस्थापन, प्रचार–प्रसारको अभावमा साथै निर्देशक, निर्माता तथा कलाकारको इगोका कारण मैथिली फिल्महरु असफल भएको बेला नयाँ फिल्म ‘मुखियाजी’लाई दर्शकहरुले कतिको रुचाउला त्योे भने हेर्न बाँकी नै छ ।

मिति ः २०६८ अषाढ ५ गते