धनुषाबाट २८ र महोत्तरीबाट १३ सभासद

द एक्सक्लुसिभ सम्वाददाता
जनकपुरधाम............
संबिधान सभामा धनुषाबाट प्रतिनिधित्व गर्ने सभासदहरुको संख्या बुधबार २८ पुगेकोछ । संघिय समाजबादी पार्टी (अशोक राई)ले धनुषा जिल्लाको निर्वाचन क्षेत्र नम्बर ५ मा पर्ने रमदैया भवाडी गाविसकी उर्मलिा साहलाई सभासदमा निर्वाचित गरेपछि संख्या बढेर २८ पुगेकोछ ।
यस अघि धनुषाबाट प्रत्यक्ष र समानुपातिकगरि सभासदहरुको संख्या २७ थियो । संघिय समाजबादी पार्र्टीबाट सभासद बनेकी साह पहिलो संबिधान सभामा एमालेबाट सभासद बनेकी थिइन । पार्टी फेरेर सभासद बन्ने अत्यन्त थोरै भाग्यशाली नेताहरु मध्ये साहपनि एक हुन । धनुषाबाट अब नेपाली कांग्रेसका प्रत्यक्ष ५ र समानुपातिक ९ गरी १४ सभासद, एमालेको १ प्रत्यक्ष र ३ समानुपातिकगरि   ४ सभासद, एमाओवादीबाट २ समानुपातिक सभासद, तमलोपाका २ समानुपातिक सभासद, सदभावनाको १ प्रत्यक्ष र १ समानुपातिकगरि २ सभासद, नेकपा माले (सीपी मैनाली) बाट १ समानुपातिक सभासद, राप्रपाबाट १ समानुपातिक सभासद, रामसपाबाट १ जना समानुपातिक सभासद र संघिय समाजबादीबाट १ समानुपातिक सभासद धनुषाबाट परेकाछन ।
संबिधान सभामा समानुपातिक सुचि नबुझाउने अडानमा रहेको संघिय समाजबादी पार्टीले बुधबार पाँच सदस्यको नाम निर्वाचन आयोगमा बुझाएको छ । सभासद चयन गर्न आन्तरिक बिबादमा अल्झेको संघिय समाजवादी पार्टीले निर्वाचित सदस्यहरुको नाम टुंगो लगाउने बितिकै सुचि निर्वाचन आयोगमा बुझाएकोछ । संघिय समाजबादी पार्टीबाट समानुपातिक सभासद निर्वाचित हुनेहरुमा अध्यक्ष अशोक राई, उपमहासचि राधा तिमल्सिना सचिव डिलबहादुर नेपाली, उर्मिला साह र कासिम अलि सिद्दिकी रहेकाछन । धनुषाकी उर्मिला साह यस अघि नेकपा एमालेबाट समानुपातिक सभासदमा निर्वाचित भएका थिए । समान्य लेखपढ गर्न सक्ने साहले जनताको हितमा संबिधान जारी गर्ने दाबी गरे ।
उपत्यकापछि सर्बाधिक सभासद भएको जिल्लामा धनुषा परेकोछ । २८ जना सभासद भएपनि दलका नेताहरुमा सन्तुष्टि देखिएको छैन । प्रायःसबै दलहरुमा समानुपातिक सभासद बन्ने अवसर नपाएकाहरुले गंभीर असन्तुष्टि जनाएकाछन । सबै भन्दा बढी सभासद रहेको नेपाली कांग्रेसमापनि नेताहरु सन्तुष्ट देखिएका छैनन । प्रत्यक्ष तर्फको चुनावमा अन्तरघात गरेको आरोप निर्वाचित सभासद दिनेश प्रसैलाले लगाएपनि सरस्वती चौधरी सभासद हुन नपाएकोमा अत्यन्त दुखी बनेकी छन । हुनत उनी पहिलो संबिधान सभामा सभासद थिइन । पहिलो संबिधान सभामा रहेकाहरु मध्ये धनुषाबाट प्रत्यक्ष तर्फ रामकृष्ण यादव, विमलेन्द्र निधि, सञ्जय कुमार साह र सत्रुधन महतो दोस्रो संबिधानमा दोहरिएका छन । त्यसैगरि समानुपातिक तर्फ नेकांका महेन्द्र यादव, मिनाक्षी झा, संघिय समाजबादीकी उर्मिला साह दोहरिने सभासद हुन । २८ जना सभासद मध्ये ७ जना सभासद दोस्रो संबिधान सभामा प्रतिनिधित्व गर्ने अवसर पाएका छन । पहिलो संबिधान सभामा धनुषाबाट २१ जना सभासद थिए । पहिलो र दोस्रो दुबैमा नेकांबाट नै सर्बाधिक सभासद बनेकाछन ।
समानुपातिकमा ७ सहित महोत्तरीबाट १३ सभासद
संविधानसभा निर्वाचनको समानुपातिक प्रणालीबाट महोत्तरीबाट सात जना सभासद चुनिएका छन । दलहरुले निर्वाचन आयोगमा बुझाएको सूची अनुसार महोत्तरीबाट पाँच वटा राजनीतिक दलबाट सात जना सभासद बनेका हुन । महोत्तरीबाट सबैभन्दा बढी एकीकृत माओवादीले तीन जनालाई सभासद बनाएको छ । त्यसैगरी कांग्रेस, एमाले, राप्रपा नेपाल र राष्टिूय मधेश समाजबादी पार्टीले एक एक जनालाई सभासद बनाएका छन ।
    एकीकृत माओवादीले वाइसिएलका जिल्ला अध्यक्ष महोत्तरीको रामगोपालपुर निवासी लालेन्द्रकुमार मण्डल, महिला नेतृ लक्ष्मिनियाँकी अनिताकुमारी परियार र अखिल क्रान्तिकारीकी केन्द्रीय उपाध्यक्ष निशा साहलाई सभासद बनाएको हो । त्यसैगरी नेपाली कांग्रेसले रामगोपालपुरकी संगिता मण्डल, एमालेले  खयरमाराकी रञ्जना माझी, राप्रपा नेपालले सुशिल श्रेष्ठ र राष्टिूय मधेश समाजवादी पार्टीले लोहारपट्टीका धर्मेन्द्र साहलाई समानुपातिक तर्फबाट सभासद चयन गरेको छ । प्रत्यक्ष निर्वाचनबाट चयन भएका ६ र समानुपातिकका ७ गरी महोत्तरीबाट संविधान सभामा प्रतिनिधीत्व गर्ने सभासदको संख्या १३ पुगेको छ । मधेशी जन अधिकार फोरम नेपाल र संघीय समाजवादी पार्टीले समानुपातिक सभासद्को नामावली बुझाउन बाँकी रहेकाले ती दुईदलबाट समेत सभासद छान्दा महोत्तरीबाट सभासद बन्नेको संख्या वढ्न सक्ने देखिन्छ ।


मिति ः २०७०÷०९÷२१