नेपाली राष्ट्रिय क्रिकेट टीमका पुर्व कप्तान विनोद दाससँग नेपालको बर्तमान क्रिकेट, जनकपुरको टुर्नामेन्ट र अन्तराष्ट्रिय क्रिकेटबारे द एक्सक्लुसिभका सम्पादक अजय अनुरागीले गरेको वार्तालापको सम्पादीत अंश प्रस्तुत छ ः
नेपालमा घरेलु क्रिकेट एक किसिमले मृत प्रायः भइसकेको अवस्थामा जनकपुरका स्थानियवासीको सहयोग र जिल्ला क्रिकेट संघ धनुषाको आयोजनामा भएको दीपक गुप्ता मेमोरियल दोस्रो टुर्नामेन्टमा कलैया टीमको तर्फबाट तपाईले खेल्नु भयो । कसरी लिनुभयो, यो टुर्नामेन्टलाई ?
नेपालमा स्तरीय क्रिकेट टुर्नामेन्टको अति नै खाँचो छ । एउटा राष्ट्रिय टुर्नामेन्ट खेल्थ्यौं, त्यो पनि १५÷२० दिनको मात्र हुन्छ । त्यसकारण हामी भर पर्ने भनेकै यस्तो खालको टुर्नामेन्ट हो । जनकपुरबाट पाठ सिकेर अरु ठाउँहरुमा पनि यस्तै टुर्नामेन्ट हुन थाल्यो भने कम से कम हाम्रो सीजनको ५÷६ महिनाको समयको सदुपयोग हुन सक्छ । महिनामा कम्तिमा एउटा टुर्नामेन्ट आयोजन हुन थाल्यो भने नेपालको क्रिकेटलाई ठुलो पुग्छ ।
राज्यले यस तर्फ किन ध्यान दिन नसकेको होला ?
राज्यले ध्यान दिएकै छैन भनेर पनि भन्न मिल्दैन । राज्यले क्रिकेटलाई लिएर विशेष कार्यक्रमहरु लिएर आउँदैछ । राखेपले क्रिकेटलाई विशेष खेलको रुपमा हेरिरहेकोछ । ग्राउण्ड बनाउने देखि लिएर, हाई पर्फोमेन्स टीम बनाउने, इनडोर नेट्स किर्तीपुरमा बनाइसकेको छ । त्यो हेर्दा ढिलो नै भए पनि काम सुरु भएको छ । आशा गरौं, यसले गति लिओस र आउँदो दिनमा काठमाण्डौमा मात्र सिमित नभएर जनकपुर, बीरगन्ज, विराटनगर, भैरहवा जस्तो ठाउँहरुमा पनि त्यो सुविधाहरु विस्तारै शिफ्ट भएको हामी हेर्न पाउँछौं ।
देशमा क्रिकेटको क्षेत्रहरु छुट्टिएपछि क्रिकेटको स्तर वढेको हो कि घटेको हो ?
पहिला जनकपुर, विरगन्ज, पर्सा, रौतहट मिलेर एउटा टीम बनाइन्थ्यो । त्यतिखेर हामीसँग एउटा अप्सन हुन्थ्यो । सात÷आठ वटा टीमबाट एउटा टीम छान्दा खेरी अवश्य पनि एउटा टीम भन्दा राम्रो टीम बन्थ्यो । एउटै टीम जनकपुरकै अनिल मण्डल, संजम रेग्मी, म जस्ता खेलाडीहरु हुन्थ्यो । अहिले खेलाडी बाँडिएको छ जसले टीमको ‘स्टे«न्थ’ मा अलिकति असर पर्छ । तर, यसले अरु खेलाडीहरु जो खेल्न पाउँदैन्थे, टीममा पर्न सक्दैन्थे, त्यसलाई भने अवसर प्रदान गर्छ । ती खेलाडीहरुले अहिले मौका पनि पाइराखेका छन् । अहिले आज अलिकति कमजोर देखिएको होला तर अलिकति टाइम स्पेन्ड गरेपछि, सस्टेन गरेपछि विस्तारै टीमले कभर अप गर्छ । किन भन्ने माथिल्लो लेभेलमा एपीएफ, आर्मी जस्तो टीमसँग प्रतिस्पर्धा गर्न अलि गाह्रो छ । ती टीमहरुलाई ‘कम्पिटिसन’ दिनु छ भने अलिकति हाम्रो टीमहरुलाई पनि सुधार गर्नु पर्ने हुन्छ । विस्तारै हाम्रो मोफसलको टीमहरु पनि बलियो हुँदै जानेछ ।
देशका स्टार क्रिकेटरहरु एपीएफ र आर्मी टीममा छन् । उनीहरुको एक हदसम्म करार गरेर भए पनि क्रिकेटहरुको जिविकोपार्जनको एक हदसम्म समस्या समाधान भएको जस्तो देखिन्छ तर अन्य टीमहरुको त भविष्य सुरक्षित भएन नि, हैन ?
मैले अघि नै भने । यसको फाइदा, वेफाइदा दुवै हुन्छ । क्षेत्रहरुमा प्लेयरहरुको संख्या नामको लागि त वढ्यो तर खेलको स्तर चाँही खस्केकै हो । एपीएफ, आर्मीले टीम खेलाडीहरुले जागिरको लागि हात फैलाउनु परेन । करियरको बारेमा वढी सोच्नु परेन । यो राम्रो ‘स्टार्ट’ हो । भारतमा रेल्वेहरुमा जसरी सर्विसेजहरु हुन्थ्यो, एयर इन्डिया, क्लवहरुले टीम बनाउन थाल्यो त्यसैगरी नेपाली क्रिकेटमा पनि त्यस्तै सहयोग हुन सक्ने आशा गरौं ।
जनकपुरका खेलाडीहरुले विगतमा विरगन्जसँग वा तपाईहरुसँगै खेल्दा खेलाडी छनौट गर्दा विभेद गरिन्थ्यो भन्ने आरोप लगाउँथे । अहिले पनि राष्ट्रिय टीम बनाउँदा समेत विभेद गरिन्छ, भनेर भन्छन् । अण्डर नाइनटिनमा बल्र्डकप होस वा अन्य अन्तराष्ट्रिय प्रतियोगिता, टीममा जसो तसो परे पनि दिन डिजर्भिङ् हुँदा हुँदै प्लेयिङ्ग एलेभेनमा परिदैनन भन्ने आरोप लाग्ने गर्छ । यो कतिको सत्य हो ? के काठमाण्डौ साँच्चै बायस्ड भएकै हो ?
हेर्नुस टीममा प्लेयर नपरेपछि अलिकति खल्लो लाग्नु स्वभाविकै हो । हरेक प्लेयरलाई लागिरहेको हुन्छ कि म राम्रो छु, तर गर्नुपर्ने ठाउँमा प्रुभ पनि त गर्नु प¥यो नि । यदि तपाईमा ‘क्यलिबर’ छ भने प्रुभ गर्नुस, ठाउँ पाइन्छ नै । अनिल मण्डल तपाईकै ठाउँको हो, म पनि काठमाण्डौको बासिन्दा त होइन । त्यस्तै धेरै खेलाडीहरु छन जो टीममा परिरहेका छन् । हेर्नुस, सुविधा काठमाण्डौमा वढी छ । चाहे त्यो क्रिकेटर होस या वौलिङ्ग मेसिनहरु होस । त्यो परिप्रेक्षमा काठमाण्डौलाई ‘एडभन्टेज’ भने छ । म नकार्दिन । क्रिकेटरमा क्रिकेट प्रति भोख मोफसलमा पनि छ । सुविधा नपाएर पनि त्यो लेभेलमा मोफसलका क्रिकेटरहरुको ‘कम्पिट’ गरिराखेकै छन् । टीममा परिएन भनेर गुनासो यदि गरिराखेका छन् भने त्यो खेलाडीको व्यक्तिगत धारणा होला । त्यो खेलाडीले आफ्नो स्कोर बुक पनि देखाउनु पर्छ होला । मैले पनि २० स बनाए र उसले पनि २० स. मात्रै बनायो र पनि उ नै किन सेलेक्सनमा पर्छ भने त्यसको धेरै ‘फ्याक्टरहरु’ हुन्छन् । एटिट्युड, एज फ्याक्टर लगायतका कुरामा पछि परेको हुन सक्छन । मोफसलकै कारण बायस्ड हुँदैन ।
तपाई नेपाल क्रिकेट टीमको पुर्व कप्तान पनि हुनु हुन्छ । टी ट्वेन्टी वल्र्डकप खेल्न जाँदैछ, नेपाल । सम्भवतः त्यो टीमको सदस्य जनकपुरका अनिल मण्डल पनि हुन पाउँछन होला । यो कस्तो सफलता हो, नेपालको लागि ?
वल्र्डकप खेल्नु नेपालको लागि धेरै ठुलो कुरा हो । जुन प्रकारको हाम्रो ‘इन्फ्रास्टक्चर’ छ, ‘डोमेस्टिक स्ट्रक्चर’ छ, त्यस अवस्थामा धेरै ठुलो कुरा हो । तर, एकचोटी शिखरमा पुग्नु मात्र ठुलो कुरा होइन, त्यसका लागि डोमेस्टिक स्ट्रक्चर सुधार्ने, इन्फ्रास्ट्रक्चर सुधार्ने, प्लेयरहरुलाई वेटर फ्यासिलिटिज प्रोभाइड गर्ने लगायतका गृहकार्यमा ध्यान दिनु पनि उत्तिकै जरुरी छ । सर्टेन प्लेयरहरु खेललान् । मे बी तपाईले पनि भन्नु भयो अनिलले खेल्न पाउला÷नपाउला, पारस पर्ला÷नपर्ला त्यो अहिले नै भन्न सकिन्न ।
विनोद दास नेपाल क्रिकेट टीमका पुर्व कप्तान, वर्तमान सदस्य जनकपुरमा टुर्नामेन्ट खेलिरहेका छन् । तर, विश्वकप टीमको स्क्वाडमा विनोद दास पर्न सक्ने सम्भावना कति छ ? कि ढोका बन्द भइसक्यो ?
सेलेक्सन मेरो पहुँचको कुरा होइन । मेरो काम खेल्ने हो । म कस्तो खेल्छु त्यसको एनालिसिस गर्ने काम तपाई पत्रकारहरुको हो । सेलेकसन कमिटी, क्यानको काम हो छनौट गर्ने, जसले हेरि पनि रहेको छ । म टीममा पर्नु वा टीममा किन छैन भन्ने खोज्ने काम मेरो होइन । जहाँ सम्म मलाई लाग्छ मैले क्रिकेट ठीकै खेलिरहेको छु । म आफुमा आफ्नो खेलसँग सन्तुष्ट छु ।
तपाई पुर्व कप्तान पनि हुनु हुन्छ । तपाईलाई सेलेक्सनको तिकडम, एप्रोच, राजनीति सबै कुरा थाहा होला । तपाई नपर्नु कहिं न कहिं मोफसलकै भएका कारण विभेद त गरिएको होइन ? पाखा लगाइएको त होइन ?
हेर्नुस, म फिट भइदिएको भए टीममै हुन्थे होला । बीचमा इन्ज्यरड भएँ र वाहिर परें । त्यसपछि कसैले पनि टीम छनौट गर्दा त्यो फलानो ठाउँको हो भनेर छनौट गर्दैन । मलाई टीम पिक गर्न दियो भने सर्टेन प्लेयरहरु नपर्न सक्छन होला । या सर्टेन प्लेयर पर्ला । त्यसको अर्थ यो होइन कि ठाउँका कारण विभेद हुन्छ ।
नेपाल क्रिकेट टीमका दुई जना प्रशिक्षकहरु रोय डायस र पुवुदु दासनायके, नेपाल क्रिकेट टीमको स्तरोन्नतीमा कस्तो योगदान र भिन्नता पाउनु भयो ?
दुई जनाको नामै फरक छ, भुमिका फरक हुने नै भयो । हरेक मान्छेको आ–आफ्नै स्टूेन्थेन र विकनेस हुन्छ । पुवुदुको आफ्नो ठाउँमा स्टे«न्थहरु छन भने रोय डायसको फरक स्टे«न्थ थियो । दुवै जनाले गर्न सक्ने वेस्ट सेवा प्रदान गर्नु भइरहेको छ । नेपाल क्रिकेटको सफल कोचहरुमध्ये दुवै जना पर्नु हुन्छ ।
मिडियाहरुले पुवुदुको जय–जयकार गरिराखेका छन् । के रोय डायसको भुमिका थिएन र ?
हेर्नुस, मानिसले जहिले पनि कुरा गर्दा शिखरमै रहेको मानिसको कुरा गर्छ । कति जनाको काँधमा टेकेर शिखरमा पुगियो, त्यो कुराको ध्यान दिइँदैन । त्यो गलत हो । रोय डायसले नेपालमा १० वर्ष वसेर धेरै ठुलो योगदान दिनु भएको छ ।
रोय डायससँग त तपाईको राम्रै केमेस्ट्री थियो नि हैन ?
राम्रो र नराम्रो कुरा हुँदैन । जो कुनै पनि कोच र क्याप्टन हुन्छ, उनीहरुको आ–आफ्नो भ्यू हुन्छ । आफ्नो सोचले अगाडी वढ्ने काम गर्छ । मैले जति सके नेपाली क्रिकेटलाई आफ्नो वेस्ट दिन खोजें । त्यसमा कतिपय ठाउँमा सफल पनि भइएको होला भने कतिपय ठाउँमा विफल पनि । निराशा पनि हात प¥यो होला । तर, मैले आज पनि जुन सुकै टीमबाट खेल्दा आफ्नो क्षमताको वेष्ट दिन चाहन्छु । म जवसम्म क्रिकेट खेल्नेछु वा अरु नै काम गर्ने छु तव पनि क्रिकेटको लागि समर्पित रहनेछु ।
टी ट्वान्टी विश्वकप त खेल्न पाइराखेका छौं । तर, विश्वकपमा छनौट भएनौं, अझ वानडे स्टेटस पनि पाउन सकेनौं । यो कस्तो दुर्भाग्यपुर्ण अवस्था हो ?
हेर्नुस, यसको बारेमा धेरै चर्चा परिचर्चा भईसकेको छ । अब पुगेनौं भन्दैमा हाम्रो टीम खराब, म्यानेजमेन्ट खराब वा त्यो खराब भन्दा पनि हामीले के स्वीकार्नु पर्छ भने, हामीले सबैभन्दा हाइयेस्ट लेवेलको खेल खेल्नु पर्ने थियो । तर, त्यहाँ गएर हामी आफुले सोच अनुरुप प्रदर्शन गर्न सकेनौं । टीम एज ए प्लेयर, त्यो जिम्मेवारी हाम्रो हुनु पर्छ, हामीले खेल्नु पर्छ । खेल्नै नसके पछि अरु कुरा त सेकेन्ड्री हुन । सो, मे बी हामी आफ्नो बेस्टमा थिएनौं, त्यो टुर्नामेन्टमा । तर, फेरी पनि ‘अपर्चयुनिटिज’ आउँछन् । र, हामी त्यसको लागि तयार भएर बस्नु पर्छ ।
अन्तराष्ट्रिय स्तरमा क्रिकेटहरु टन्नै रुपैयाँ कमाइराखेका छन् । नेपालको कप्तान पारस खडका पनि टीभीमा विज्ञापनमा देखा पर्न थालेका छन् । नेपालको खेलाडीहरुको लागि विज्ञापन बजारको कस्तो सम्भावना देख्नु हुन्छ ? पैसा कमाउने दिन आयो कि आएन ?
अब हेर्नुस, कर्पोरेट हाउसले नेपाली क्रिकेटको बारेमा के सोच्छ, त्यसमा निर्भर गर्दछ, आफ्नो ‘ब्राण्ड’ प्रोमोट गर्न कतिको प्रोस्पेक्ट देख्छन् । पारस नेपालका क्यापटन हुन, नेपालका बेस्ट प्लेयर मध्येका एक हुन, अहिले सबैभन्दा चर्चित नाम मध्येका एक हुन, उनी प्रति कम्पनिहरु विश्वसत भइरहेका छन् । त्यो राम्रो कुरा हो । भोली गएर त्यो अवसरहरु अरुलाई पनि आउँछ । बल्र्डकप खेल्ने सम्भवतः एउटा मात्रै टीम इभेन्ट होला । मलाई लाग्छ, खेलाडी जति डिजर्भ गरिराखेका छन, त्यो पाइराखेको छैन् ।
कर्पोरेट हाउसहरुले किन ध्यान नदिएको होला ? क्यानले त्यसको लागि इनिसिएसन लिएको छ कि छैन ?
हेर्नुस न म कर्पोरेट जगतको मान्छे हुँ, न त क्यानकै पदाधिकारी हुँ । तपाईले गलत मान्छेलाई त्यो प्रश्न गरिराख्नु भएको छ ।
हैन, तपाईको भोगाई र अनुभवले के भन्छ ?
म त एउटा प्रोडक्ट मात्र हो । मलाई किन्ने वा म माथि लगानी गर्ने÷नगर्ने त्यो कुरा त कर्पोरेट जगतको कस्तो स्ट्रयाटेजी छ, त्यसमा भर पर्छ । त्यो मैले डिटरमाइन गर्ने होइन । त्यो त प्रोडक्ट बनाउने वा किन्ने मान्छेले सोच्नु पर्ने हो ।
विश्वकप खेले पछि नेपालका क्रिकेटर माथि भारतको इन्डियन प्रिमियर लिग (आइपिएल) का टीमहरुको आँखा पर्ने सम्भावना कतिको छ ? यस अघि शक्ति गौचन राजस्थान रोयल्स टीमको क्याम्पबाट फाइदा लिइसकेका छन् । अब नेपालका क्रिकेटरलाई पनि तिनीहरुले किनलान त ?
हेर्नुस, त्यो ठुलो अवसर हो । हुनै नसक्ने कुरा त होइन । यहाँबाट कुनै प्लेयर आइपिएल खेल्नै सक्दैन भन्ने कुरा पनि होइन । तर, त्यो गाह्रो कुरा हो । त्यो म स्वीकार गर्छु । किनभने आइपीएलको लेभेल हाम्रो क्रिकेट भन्दा धेरै माथि छ । त्यहाँ इभेन वाहिरबाट आएका अन्तराष्ट्रिय क्रिकेटरहरु पनि स्ट्रगल गरिराखेका छन् । आशा गरौं, कुनै दिन हाम्रो प्लेयरहरु पनि त्यो लेभेलमा पुग्लान र आइपीएल खेल्लान । तर, त्यसको लागि क,ख,ग,घ नपढेर डाइरेक्ट महाकाव्य लेख्न सकिदैन । त्यसैले हाम्रो क,ख,ग,घ पहिला सुधारौं । त्यसपछि त्यो ठुलो सपना देखांैला ।
भारतको कप्तान महेन्द्र सिंह धोनी काठमाण्डौ आए । जर्नी टु वल्र्डकपका लागि भारतीय पुर्व खेलाडी भिभिएस लक्ष्मण आए । विश्वकपमा छनौट भए पछि सचिन तेन्दुलकरले बधाई दिए ।
नेपालको क्रिकेटको स्तरलाई माथि उठाउन भारतको विसिसिआइले मद्दत गर्न सक्छन ? वा इच्छा राखेका छन कि छैनन ?
भारत क्रिकेटमा एसियामा मात्र होइन विश्वकै सुपर पावर मध्येको एउटा हो । भारतले यदि हामीलाई सपोर्ट ग¥यो भने नहुने कुरा केही पनि छैन । तर फेरी धेरै ‘रेस्ट्रीक्सनस’ हुन्छन् । इन्डियाले हामीलाई किन सपोर्ट गर्ने ? कस्तो, के लेभेलमा सपोर्ट गर्ने त्यो कुरा पनि हुन्छ । त्यसबारे मलाई धेरै ज्ञान छैन । आशा गरौं इन्डियाले हामीलाई सपोर्ट गर्ला । तर, त्यसको लागि हाम्रो तर्फबाट पनि धेरै गृहकार्यहरु गर्न जरुरी छ । इन्डियाका खेलाडीहरु एक दिन काठमाण्डौ आउँदैमा नेपाली क्रिकेटमा कुनै जादु हुने वाला छैन । आकासमा पुग्ने होइन । तर, उनीहरुले आर्थिक, प्राविधिक र अन्य ठोस सहयोग गरेमा मत्र नेपालको क्रिकेट अगाडी वढ्न सक्छ ।
जनकपुरमा त्यत्रो क्रिकेटको क्रेज छ तर खेल्ने मैदान नै छैन । तपाई पुर्व कप्तान भएको हुनाले क्रिकेटिङ् बडीहरुसँग तपाईको समन्वय भइरहेको हुन सक्छ । जनकपुर लगायत मोफसलमा शहरहरुमा स्टेडियम निर्माण गर्न राज्यले किन ध्यान दिइरहेको छैन ?
म एउटा खेलाडी मात्र हुँ, मेरो कुनै लिन्केज छैन । म एउटा खेलाडीको नाताले आग्रह भने गर्न सक्छु । जनकपुरमा मात्र होइन, कलैया, भैरहवा सबैठाउँमा स्टेडियमको ठुलो खाँचो छ । काठमाण्डौ वाहेक कुनै पनि ठाउँमा स्तरीय ग्राउण्ड छैन । कलैयामा स्थानिय स्रोतले र क्यानको थोर बहुत सहयोगले एउटा यस्तो ग्राउण्ड छ जलाई मेन्टेन गर्न सक्यौं भने राष्ट्रिय स्तरको टुर्नामेन्टहरु गराउन सकिन्छ । वीरगन्जमा त्यत्रो पैसा लगाएर हामीले ग्राउण्ड बनायौं तर अहिले दयनीय स्थितिमा छ । त्यसैले ग्राउण्ड वनाउने मात्र होइन त्यसको स्याहार सुसारको लागि पनि धेरै खर्च लाग्छ । जवसम्म क्रिकेटको लागि सरकार र करपोरेट सेक्टरले हात हाल्दैन तवसम्म क्यान एक्लैले केही पनि गर्न सक्दैन । क्यान सँग सिमित स्रोत साधन छ, धेरै लिमिटेशनहरु छन् । अहिले तपाईहरुले जनकपुरमा टुर्नामेन्ट गराउनु भयो । हजारौंको संख्यामा मान्छेहरु म्याच हेर्न आइरहेका छन् । त्यो मान्छेले क्रिकेटको भविष्यका निम्ति सहयोग गरिदियो भने मात्र सम्भव छ । क्रिकेटले यदि जनकपुरलाई चिनाइराखेको छ भने जनकपुरको मान्छेको पनि कर्तव्य हो कि क्रिकेटलाई केही दिऊँ भनेर ।
क्यानमा केन्द्रिय सचिव हुनु हुन्छ, जनकपुरका क्षेत्रीय अध्यक्ष उत्तम कर्माचार्य । जनकपुरको क्रिकेट झन खस्किरहेको अवस्था छ । उहाँले के गर्न सक्नु पथर््यो ?
मलाई लाग्छ, उत्तम दाईलाई जहाँसम्म मैले चिनेको छु, वहाँले आफ्नो तर्फबाट पक्कै मिहिनेत गरिराख्नु भएको होला । तपाई जति सुकै मिहिनेत गर्नूस र, क्रिकेटर भइदिएन भने क्रिकेट अगाडी वढन सक्दैन । कहिं जनकपुरमा क्रिकेटरको कमी त भएको होइन । त्यो पनि सोच्नुपर्ने कुरा हो । कलैयामा पन िक्रिकेट भने पछि कुनै बेला नम्बर वान हुने गथर््यो । तर, अहिले आएर हामीले प्लेयर खोज्नु पर्ने अवस्था आएको छ । हामीसँग ग्राउण्ड छ, व्याट–बल फ्रि मा दिन्छौं, प्रशिक्षण फ्रिमा दिन्छौं, जिविस, नगरपालिकाबाट सहयोग माँगेर सामग्रीहरु किनदिन्छौं, आफुले पैसा हालेर पनि किनदिन्छौं, तै पनि खेल्न आउँदैन । तपाईले अगाडी रहनु भयो नि, काठमाण्डौ र मोफसलको क्रिकेटमा के फरक छ ? फरकै त्यै हो । काठमाण्डौमा ब्याट, बल सबै प्लेयरले आफै लिएर आउँछ, ५ सय रुपैयाँ महिनाको फी तिर्छन र खेल्छन् । तर, यहाँ सबै सामान दिएर खेलाडीलाई उल्टै हजार रुपैयाँ दिनु पर्ने पो हो कि अवस्था आइसकेको छ । जवसम्म नम्बर अफ प्लेयर वढ्दैन तव सम्म कम्पिटिशन वढ्दैन । कम्पिटिसन नबनुलजेल हामीमा क्वालिटी पनि आउँदैन ।
टुर्नामेन्टको व्यवस्थापन बारे के भन्न चाहनुहुन्छ ?
बधाइ छ, वहाँहरुलाई निकै सफलतापूर्वक टुर्नामेन्टलाई सफल पार्नु भयो । र, एउटा स्टयान्डर्ड पनि मेन्टेन गर्नु भएको छ । आउँदो दिनमा ग्राउण्ड, विकेट, वसोवास सबै कुरामा स्तरवृद्धि हुनेछ । विस्तारै–विस्तारै यी सबकुरामा कम से कम १० प्रतिशत पनि सुधार गर्दै गयो भने यसको शाख झनै वढ्छ होला । अझै पनि नेपालको स्तरीय टुर्नामेन्ट मध्ये एउटा यो पनि हो भनेर काउन्ट भै राखेको छ ।
२०७० फागुन ०४ गते
No comments:
Post a Comment