अब त संविधान बन्नैपर्छ - सम्पादकीय

कअघिल्लो संविधानसभाका सफलता र असफलताबाट पाठ सिकेर संविधान निर्माणमा दलहरु सक्रिय हुन्छन कि हुँदैनन भन्ने अहिलेको आम चासोको विषय हो । यसपटक जसरी पनि संविधान बन्नुपर्छ र त्यो पनि झारा टार्ने किसिमको नभै सबैलाई समावेश गर्ने गरी, सबैको भावनाको प्रतिनिधित्व हुने गरी बन्नुपर्छ भन्ने चाहना आम नेपालीको छ । पहिलो संविधानले गरेका सहमति र त्यहाँ रहेका विमतीहरुबीचबाट नयाँ ढंगले संविधानसभा अगाडि बढ्नुपर्ने आवश्यकता छ । वितेको पाँच वर्षमा वाग्मतीमा धेरै पानी बगिसकेको छ । सुरुका दिनमा उठेका आवाज र प्रवाहित धारणाहरु अहिले धमिलिएको छ ।
    यसपटक संविधानसभाको शक्ति सन्तुलनमा व्यापक फेरवदल आएको छ । विशेषतः वर्तमान राजनीतिक घटनाक्रमको विपक्षमा रहेको, विगतमा उठेको माग र नाराको विपक्षमा धारणा राखिरहेका दलहरुको संख्या बढी देखिएको छ । संवैधानिक राजतन्त्र सहितको हिन्दु धर्म सापेक्ष राष्टू हुनुपर्ने राप्रपा नेपाल नयाँ शक्तिका रुपमा संविधानसभामा प्रवेश गरेको छ । विवादका मुद्दाहरुको विवादका मुद्दाहरुको छिनोफानो र असहमतहरुलाई सहमतिमा ल्याउने सवालमा संविधानसभा केन्द्रित हुनुपर्ने अहिलेको प्रमुख आवश्यकता हो । सुरुवातदेखि नै आआफ्नै अडानमा कायम रहेर वृहत छलफल गर्नुको साटो कोठे र रिसोर्टका बैठकहरुमा नेताहरु केन्द्रित हुने हो भने यसपटक पनि संविधान बन्दैन भनेर भन्न कुनै गाह्रो छैन । 
    संविधान कुनै राजनतिक दलको विधान नभएकाले यसमा दलीय आग्रह थोपर्ने प्रयास गर्न खोज्नु नै अघिल्लो संविभानसभा असफल हुनुको कारण हो । यही कारणलाई मध्यनजर गर्दै प्रमुख दलहरुले संविधानसभाको बैठक बसेको ६ महिनाभित्र सहमतिको प्रयास गर्ने र त्यसो नभए एक वर्षभित्र संवैधानिक प्रावधानबाट निर्णय गरी संविधानको मस्यौदा तयार गर्ने घोषणा गरेकाले यसपटक संविधान बन्छ कि भन्ने आशा गर्ने ठाउँ छ तर यसबीचमा विदेशीको चलखेल र राजनीतिक आग्रह(पूर्वाग्रहको खेल चर्कदैन भन्नसकिने स्थिति छैन ।
    त्यसैले मुलुकको यथार्थमा टेकेर संविधान निर्माण गर्नसके मात्र त्यसले सबैलाई स्थान दिनसक्छ र सबैले आफ्नो संविधान मानेर स्वामित्व ग्रहण गर्न सक्छन भन्ने वास्तविकताबाट कोही पनि पछिहट्नु हँदैन । क्षणिक स्वार्थका लागि जसले जे भने पनि त्यसलाई सडकमा पसार्ने चरित्रको त्याग अत्यावश्यक छ । जनता अब त संविधान बन्नैपर्छ भन्ने पक्षमा छन् । यसलाई संविधानसभाभित्र प्रवेश गरेका सबै राजनीतिक दलका टाउके नेताहरुले मनन गर्नुपर्छ ।

मिति ः २०७० माघ १२ गते