द एक्सक्लुसिभ सम्वाददाता
जनकपुरधाम............
धनुषा लक्ष्मीपुर वगेवा(७, कुम्हरौरा गाउँ बस्ने महेन्द्र झाको नाति डा.विद्यानन्द झाको कान्छो छोरा हुन रंजित झा उर्फ राजन मुक्ति । २०४३ सालमा जन्मिएका रंजित २०५६ सालमा सरस्वती मा.बि. जनकपुरबाट एसएलसी उत्तीर्ण गरी अनुग्रह नारायण कलेज विहारबाट प्रविणता प्रमाण पत्र र स्नातक तह (राजनीति शास्त्र) विषय लिई उत्तीर्ण गरेका हुन । विद्यार्थी राजनीति गर्दा तत्कालिन राजा ज्ञानेन्द्रले गरेको शाही ‘कु’ का विरुद्ध भएको २०६२÷०६३ को आन्दोलनमा उनी सदभावना पार्टीका यूवा मञ्चका केन्द्रिय सदस्य र विद्यार्थी मञ्चका धनुषा प्रभारीको रुपमा सक्रिय सहभागिता जनाएका थिए । उक्त आन्दोलनका क्रममा उनी पक्राउ परेर जेल पनि गएका थिए । जेलबाट रिहा भएपछि सिरहा घर भएको नागेन्द्र पासवानको ज्वाला समुहमा लागि करिव १ वर्ष जति पोलिट व्यूरो सदस्यको रुपमा उनी कार्यरत थिए । पछि ज्वाला सिंह सँग पार्टीको काम कारवाही सम्बन्धमा कुरा नमिलेपछि उनले पार्टीबाट विद्रोह गरी ७ फागुन २०६५ मा जनतान्त्रिक तराई मुक्ति मोर्चा राजन समुह नामक छुट्टै समुह गठन गरी राजन मुक्तिले संयोजकको रुपमा पहिलो प्रेस विज्ञप्ती जारी गरेका थिए । हतियार साधन मात्र हो साध्य होइन, साध्य भनेको अन्ततः विचार नै रहेपनि बन्दुकको नालबाट नेपाली शासकले तराईमा शासन गरेका कारण ती शासकहरुबाट मुक्ति दिलाउनका लागि बाध्य भएर हतियार उठाएको राजन मुक्तिले बताएका छन् । क्रान्तिमा पनि विभिन्न चरणहरु हुन्छन् र क्रान्तिलाई निस्तेज पार्न अहिले सच्चा क्रान्तिकारीहरुलाई राज्य पक्षले पक्राउ गर्नु स्वभाविक रहेको भन्दै उनी भन्छन,“क्रान्ति संस्थागत हुन लामो समय लागेको भएपनि क्रान्तिको विसर्जन हुनेबाला छैन । शासक वर्गले जस्तो कदम चाल्छ सोही अनुरुप क्रान्तिले पनि आफ्नो बाटो लिने छ । राज्यले जति जति दमन बढाउँदै जान्छ त्यतिनै क्रान्ति पनि अगाडि वढ्ने छ ।”
सत्रुको कब्जामा परेका कारण जलेश्वर जेलमा आफु असुरक्षित रहेको भन्दै उनी भन्छन,“जब सम्म तराईको समस्या समाधान हुँदैन तबसम्म हामी लडिरहन्छौं । राज्यले अहिले पनि दमनकै बाटोलाई निरन्तरता प्रदान गर्छ भने निकट भविष्यमै राज्यले परिकल्पना समेत नगरेको जस्तो तराईमा क्रान्तिको आँधिवेहोरी आउने छ र स्वतन्त्र राष्टूको रुपमा झण्डा फहरिनेछ ।”
मधेसमा हतियार उठाएर सुरुवात गरिएको सशस्त्र क्रान्तिको ९ वर्ष वितिसक्दा करिब करिब ७० प्रतिशत यूद्ध जितिसकेको दाबी गर्दै राजन मुक्ति भन्छन,“ मधेसवादको मुद्दा पहिले देखि हरेक मधेसीको मनमा रहेपनि बाहिर निकाल्न सशस्त्र आन्दोलन नै सहायक भयो । राज्यपक्षको बन्दुक र लाठीलाई मधेसी जनताले पनि लाठी लिएर सामना मात्रै गरेनन्, राज्यको गोली खान समेत पछि परेनन् ।” मधेसमा ९ वर्ष अघि कुनै पनि सरकारी कार्यालयमा मधेसी मुलका व्यक्ति कार्यालय प्रमुख थिएनन् । दुई वर्ष अघि सम्म एक जना पनि मधेसी मुलका एसपी र सिडिओ थिएनन् । तर, अहिले मधेसी पनि कार्यालय प्रमुख बनेका छन् । एसपी सिडिओ बनेका छन् । त्यो सबै सशस्त्र क्रान्तिको उपज रहेको राजन मुक्ति बताउँछन् । उनका अनुसार नेपाल सरकारको अधिन रहेको सरकारी कार्यालयहरुमा जनताले मधेस सरकार लेखिसकेका छन् । अव त्यो दिन धेरै टाढा छैन जब लेटरप्याडमा पनि नेपाल सरकारको ठाउँमा मधेस सरकार रहने छ । मधेसवादको नाउँमा घुसपैठ गरेका मधेसी नेताहरुलाई बहिष्कार गर्न आफुहरुले गरेको अपिललाई स्वीकार गर्दै मधेसी जनताले ती कथित मधेसवादी दल र तीनका नेताहरुलाई विस्थापित गरेर देखाउनु पनि आफुहरुको जित रहेको राजन मुक्तिले दावी गर्छन् । अन्तिम लडाई अहिले पनि बाँकी रहेको भन्दै माओवादीले एउटा वर्गको विरुद्ध मात्र आन्दोलन गरको कारण राज्य पक्षले पनि उसलाई सहयोग ग¥यो तर, हाम्रो लडाई औपनिवेशको विरुद्ध रहेका कारण अलि समय लागे पनि अन्ततः हाम्रो जित हुने राजन मुक्ति बताउँछन् । कार्यपालिका, व्यवथापिका, न्यायपालिका र मिडिया समेत नेपाली शासककै कठपुत्ली रहेका कारण हाम्रो लडाईमा केही बाधा देखिएपनि जित अवस्य हुने उनको भनाई छ ।
परिवारमा आमा गिता देवी झा, बाबु डा.विद्यानन्द झा, दाई मनोज झा (मनोज मुक्ति), भाउजु नगिना देवी झा, ६÷७ महिनाको भतिजी योगन्या झा रहेको राजन मुक्तिले परिवारिक परिचय दिएका छन् । आर्थिक अवस्था ठिकै रहेको, लक्ष्मीपुर वगेवा(७ मा ४ कठ्ठामा २ तले घर वाहेक अन्य जमिन नभएको, अन्य जग्गा जमिन भए एकिन थाहा नभएको राजनले बताएका छन् । संविधान सभाको चुनाव पछि प्रचण्ड सरकारसँग वार्ता गर्न राजीव झाको नेतृत्वमा मनोज मुक्ति, राम सोभित यादव संम्मिलित ३ सदस्यीय टोली २०६५ पुषमा वार्तामा आएका थिए । वार्ताको क्रममा अविनाश मुक्तिको हत्या भएपछि वार्ता भंग गरेपनि राजिव झा अलग्गिए ।
राजनका अनुसार करिब २ सय देखि २ सय ५० जना कार्यकर्ताहरु अहिले पनि विभिन्न झुठा मुद्दामा गिरफ्तार छन भने करिब ३० देखि ३५ जना कार्यकर्ताको प्रहरीले इन्काउण्टर गरी हत्या गरिसकेका छन् । १२ माघ २०७० मा जलेश्वर जेल चलान भएका राजन मुक्ति अझै पनि राज्यसँग बार्ता गर्न तयार रहेको बताएका छन् । अध्यक्ष सुप्रिमो रहेको उनको संगठनमा पोलिटव्यूरो, केन्द्रिय कमिटी, जिल्ला कमिटी देखि विद्यार्थी, यूवा समेतको सांगठनिक ढाँचा रहेको उनी बताउँछन् ।
(जलेश्वर कारागारमा राजन मुक्ति भनिने रंजित झासँग जलेश्वर कारागारमा द एक्सक्लुसिभका सम्पादक अजय अनुरागीले गरेको कुराकानीमा आधारित)
२०७० चैत्र ०२ गते आईतबार
No comments:
Post a Comment